კომენტარი

„ენგურჰესის“ ექსპლუატაციასთან დაკავშირებით მოსკოვში ქართულ-რუსულ-აფხაზური შეხვედრა გაიმართა - მამუკა არეშიძე

„ენგურჰესის“ ექსპლუატაციის სამუშაო ჯგუფის წევრის, ექსპერტის, მამუკა არეშიძის ინფორმაციით, ოკუპირებული აფხაზეთისთვის ელექტროენერგიის ტარიფის ზრდასა და თანხების ამოღების საკითხზე, ქართულ-რუსულ- აფხაზურ მხარეებს შორის უკვე ორი შეხვედრა შედგა.

არეშიძის თქმით, ერთი მათგანი სტამბოლში, მეორე კი მოსკოვში გაიმართა.

როგორც არეშიძემ პრესკონფერენციაზე აღნიშნა, „ენგურჰესთან“ დაკავშირებით დღეს არსებული მდგომარეობა ფინანსურად წამგებიანია, როგორც საქართველოსთვის, ასევე რუსეთისთვის, თუმცა შექმნილ მდგომარეობას აფხაზური მხარე ადგილზე ვერ აგვარებს.

„ენგურჰესისი“ ექსპლუატაციასთან დაკავშირებით უკვე ორი შეხვედრა შედგა ჩვენს კოლეგებთან. მე ვარ ამ სამუშაო ჯგუფში, ქართულ-აფხაზურ-რუსული შეხვედრები იყო. ეს არის ერთადერთი თემა, რომელზედაც რუსული და ქართული მხარის პოზიციები ერთმანეთს ემთხვევა, აფხაზურის კი განსხვავდება. თუმცა, ის ადამიანები ვინც ესწრებოდნენ აფხაზეთიდან ამ შეხვედრებს, გვეთანხმებიან, რომ არანორმალური მდგომარეობაა.

ქართული და რუსული პოზიციები ემთხვევა იმაში, რომ არ შეიძლება ასეთი არანორმალური მდგომარეობა აფხაზეთში. გვეთანხმებიან, რომ არ შეიძლება ფულის ამოღება არ ხდებოდეს, რომელიც მხოლოდ გალის რაიონში ხდება. არ შეიძლება, რომ სადენების რეაბილიტაცია არ ხდებოდეს. ზარალს ყველა მხარე ნახულობს, ადგილობრივი, აფხაზური მოსახლეობის გარდა ზარალს ნახულობს ყველა მხარე.

ჩნდება კითხვა, რატომ არ შეიძლება აფხაზურმა მხარემ ეს საქმე მოაგვაროს. ეს იმიტომ, რომ გადახდის კულტურა დაიკარგა. ახლა რომ მიადგე და უთხრა გადაიხადეო, შეიძლება ავტომატით გამოგივარდეს. აფხაზური მხარე ამ საკითხს ვერ აგვარებს. თუ თანხის ამოღება არ მოხდა, და ეს სისტემა არ დალაგდა, დონორები უარზე არიან დააფინანსონ ენგურის რეაბილიტაცია.

თებერვალში ენგური ჩერდება. გადაწყვეტილია, რომ 2,3,4 თვით გამომდინარე იქიდან თუ რა პრობლემები არის თვითონ ენგურის საძირკველში და ასე შემდეგ.

ჩვენთვის თანხების ამოუღებლობა წამგებიანია, რადგან რუსეთი აფხაზეთს, მერე საქართველოს გავლით ელექტროენერგიას დაბალი ტარიფით აწვდის. თვითონ რუსებიც კარგავენ თანხებს, რადგან დაბალი ტარიფით აწვდიან.

ერთი შეხვედრა სტამბოლში შედგა, მეორე მოსკოვში. მოსკოვში უნივერსიტეტის ბაზაზე გაიმართა და მასში მონაწილეობდნენ სტუდენტები და მაგისტრანტები - რუსები, ქართველებიც და აფხაზებიც, რომლებიც იქ სწავლობენ. ამ შეხვედრების დონორია შვეიცარიული მხარე.

აფახზეთში სამონიტორინგო პროცესი იქნება, რომ მოხდეს ტარიფების ზრდა. საზოგადოების მომზადება იწყება. ჩვენ კი შემდგომში გავაგრძელებთ მონიტორინგს იმაზე, თუ რამდენად არის ჩართულობა საზოგადოებირივი ორგანიზაციების და რამდენად ეფექტურია ეს ყველაფერი“,-განმარტა არეშიძემ.

მონიკა დავლიანიძე