მსოფლიო

დონალდ ტრამპმა კიმ ჩენ ინთან შეხვედრის გადადება არ გამორიცხა

აშშ-ის პრეზიდენტმა დონალდ ტრამპმა განაცხადა, რომ შემდეგი თვისთვის დაგეგმილი შეხვედრა ჩრდილოეთ კორეის ლიდერ კიმ ჩენ ინთან, შესაძლოა, არ შედგეს.

ტრამპმა აღნიშნა, რომ ფხენიანმა უნდა მიიღოს მოლაპარაკებების პირობები, თუმცა თუ ეს არ მოხდება, შეხვედრა შესაძლოა, „მოგვიანებით“ შედგეს. აშშ-ის პრეზიდენტს არ დაუკონკრეტებია, რა პირობები დაუყენა ვაშინგტონმა ჩრდილოეთ კორეას, თუმცა აღნიშნა, რომ „დენუკლერიზაცია უნდა მოხდეს“.

ჟურნალისტებთან საუბრისას ტრამპმა განაცხადა, რომ კიმ ჩენ ინის პოზიცია ჩინეთში განხორციელებული მეორე ვიზიტის შემდეგ შეიცვალა.

ცნობისთვის, ოფიციალურმა ფხენიანმა მას შემდეგ დაიწყო საუბარი 12 ივნისისთვის დაგეგმილი შეხვედრის ჩაშლაზე, რაც ეროვნული უსაფრთხოების საკითხებში აშშ-ის პრეზიდენტის მრჩეველმა ჯონ ბოლტონმა განაცხადა, რომ ჩრდილოეთ კორეა დენუკლერიზაციის პროცესში „ლიბიურ მოდელს“ მიჰყვეს.

2003 წელს ლიბიის მაშინდელი პრეზიდენტი მუამარ კადაფი დასავლეთს ბირთვული პროგრამის გაუქმებას დათანხმდა სანქციების მოხსნის სანაცვლოდ. 8 წლის შემდეგ პროდასავლურმა მეამბოხეებმა კადაფი მოკლეს.

ჩრდილოეთ კორეის უკმაყოფილება გამოიწვია აშშ-ისა და სამხრეთ კორეის ერთობლივმა სამხედრო სწავლებამ სახელწოდებით „Max Thunder“. ამის გამო ფხენიანმა კიმ ჩენ ინისა და სამხრეთ კორეის პრეზიდენტის, მუნ ჯე ინის შეხვედრა გააუქმა, რომელიც 16 მაისს უნდა შემდგარიყო. კითხვის ნიშნის ქვეშაა, შედგება თუ არა სინგაპურში 12 ივნისისთვის დაგეგმილი მოლაპარაკება კიმ ჩენ ინსა და მის ამერიკელ კოლეგას დონალდ ტრამპს შორის.

აშშ-სა და სამხრეთ კორეის საერთო სწავლების გამო კიმ ჩენ ინმა ბოლო 2 წლის განმავლობაში პიურველად მოიწვია სამხედრო კომისია.