მსოფლიო

დონალდ ტრამპმა იერუსალიმი ისრაელის დედაქალაქად აღიარა

აშშ-ის პრეზიდენტმა დონალდ ტრამპმა იერუსალიმი ისრაელის დედაქალაქად აღიარა. გადაწყვეტილებას უკვე მოჰყვა საპროტესტო ტალღა მთელ მსოფლიოში.

ტრამპმა ასევე გასცა ბრძანება, რომ სახელმწიფო დეპარტამენტმა დაიწყოს აშშ-ის საელჩოს გადატანის პროცესი თელ-ავივიდან იერუსალიმში. აშშ-ის პრეზიდენტმა ამას უწოდა „ნაბიჯი სამშვიდობო პროცესების წინ წაწევისთვის“ ისრაელსა და პალესტინელებს შორის.

ტრამპმა სიმშვიდისკენ მოუწოდა რეგიონში, თუმცა არ წყდება საპროტესტო აქციები პალესტინელების ლტოლვილთა ბანაკში იორდანიის დედაქალაქ ამანში, ასევე ღაზასა და აშშ-ის საელჩოს წინ სტამბულში. აშშ-ის სახელმწიფო დეპარტამენტმა თავის წარმომადგენლობას სხვადასხვა ქვეყანაში უკვე გაუგზავნა გაფრთხილება უსაფრთხოების ნორმების გაძლიერების შესახებ.

იერუსალიმის დიპლომატიური სტატუსისა და აშშ-ის საელჩოს ადგილმდებარეობის შეცვლით ტრამპმა შეასრულა კონგრესისი მიერ 1995 წელს აღებული ვალდებულება, ე.წ. „იერუსალიმის საელჩოს აქტი“, რომელიც ავალდებუებს ფედერალურ ხელისუფლებას, გადაიტანოს თავისი საელჩო წმინდა ქალაქში.

იერუსალიმის სტატუსი ერთ-ერთი გამოწვევაა ისრაელ- პალესტინას კონფლიქტში. პალესტინელები მიიჩნევენ, რომ იერუსალიმის აღმოსავლეთი ნაწილი მათი მომავალი სახელმწიფოს დედაქალაქი უნდა გახდეს.

ტრამპის განცხადებას მსოფლიო ლიდერებიც გამოეხმაურნენ. ბრიტანეთის პრემიერ-მინისტრმა თერეზა მეიმ თქვა, რომ ეს აღიარება არ უშველის რეგიონში სიმშვიდის დამყარებას, და არ აპირებს, იგივე გააკეთოს. აშშ-ის ნაბიჯი გააკრიტიკეს საფრანგეთის პრეზიდენტმა ემანუელ მაკრონმა და გერმანიის კანცლერმა ანგელა მერკელმა.

იორდანიამ ოფიციალურად განაცხადა, რომ ტრამპის აღიარება ფიქტიურია, რადგან ამით აშშ აღიარებს ისრაელის მიერ აღმოსავლეთ იერუსალიმის ოკუპაციას. თურქეთმა ტრამპის გადაწყვეტილება უპასუხისმგებლო უწოდა.

ანა მებურიშვილი