მსოფლიო

დონალდ ტრამპის მიერ მექსიკისა და კანადის იმპორტზე დაწესებული 25%-იანი ტარიფები ძალაში შევიდა

ამერიკის პრეზიდენტის, დონალდ ტრამპის, მიერ მექსიკისა და კანადის იმპორტზე დაწესებული 25%-იანი ტარიფები ძალაში შევიდა. ეს ნაბიჯი აშშ-ის უმთავრეს სავაჭრო პარტნიორებზე ზეწოლის ნაწილია, თუმცა ეკონომიკურ სტაბილურობას საფრთხეს უქმნის.

ამასთან, ტრამპმა ჩინეთიდან იმპორტირებულ პროდუქციაზე ტარიფი 10%-დან 20%-მდე გაზარდა. თეთრი სახლის განცხადებით, ეს გადაწყვეტილება მექსიკისა და კანადის მხრიდან ნარკოკარტელების წინააღმდეგ არასაკმარისი ზომების მიღებას უკავშირდება.

ექსპერტები შიშობენ, რომ ტარიფების ზრდა სამომხმარებლო ფასებს კიდევ უფრო აამაღლებს, რაც აშშ-ის ეკონომიკისთვის მნიშვნელოვან გამოწვევას წარმოადგენს. აშშ-ში იმპორტირებული საქონლის 40%-ზე მეტი სწორედ ამ სამი ქვეყნიდან მოდის. განსაკუთრებით დაზარალდება ავტომობილების, ელექტრონიკის, სურსათისა და კომპიუტერების ბაზარი.