მსოფლიო

დონალდ ტრამპის მიერ კიმ ჩენ ინთან შეხვედრის ჩაშლის მიუხედავად ჩრდილოეთ კორეა მოსალაპარაკებლად ისევ მზადაა

ჩრდილოეთ კორეა ჯერ კიდევ მზადაა აშშ-სთან „ნებისმიერ დროს, ნებისმიერ ფორმატში“ მოსალაპარაკებლად იმის მიუხედავად, რომ დონალდ ტრამპმა კიმ ჩენ ინთან 12 ივნისისთვის დაგეგმილი შეხვედრა გააუქმა.

ჩრდილოეთ კორეის საგარეო საქმეთა მინისტრის მოადგილემ, კიმ კაი-გვანმა ტრამპის გადაწყვეტილება „ძალიან სამწუხარო“ უწოდა.

აშშ-ის პრეზიდენტმა შეხვედრა გუშინ გააუქმა და შესაბამისი წერილი კიმ ჩენ ინს გაუგზავნა. ტრამპმა ფხენიანი „ღია მტრობაში“ დაადანაშაულა.

ცნობისთვის, სინგაპურში 12 ივნისისთვის დაგეგმილი შეხვედრის ჩაშლაზე ფხენიანმა დაიწყო საუბარი მას შემდეგ, რაც ეროვნული უსაფრთხოების საკითხებში აშშ-ის პრეზიდენტის მრჩეველმა ჯონ ბოლტონმა განაცხადა, რომ ჩრდილოეთ კორეა დენუკლერიზაციის პროცესში „ლიბიურ მოდელს“ უნდა მიჰყვეს.

2003 წელს ლიბიის მაშინდელი პრეზიდენტი მუამარ კადაფი დასავლეთს ბირთვული პროგრამის გაუქმებას დათანხმდა სანქციების მოხსნის სანაცვლოდ. 8 წლის შემდეგ პროდასავლურმა მეამბოხეებმა კადაფი მოკლეს.

ჩრდილოეთ კორეის უკმაყოფილება ასევე გამოიწვია აშშ-ისა და სამხრეთ კორეის ერთობლივმა სამხედრო სწავლებამ სახელწოდებით „Max Thunder“. ამის გამო ფხენიანმა კიმ ჩენ ინისა და სამხრეთ კორეის პრეზიდენტის, მუნ ჯე ინის შეხვედრა გააუქმა, რომელიც 16 მაისს უნდა შემდგარიყო.