მსოფლიო

დონალდ ტრამპის აღიარებას შესაძლოა, შემაშფოთებელი გავლენა ჰქონდეს - ფედერიკა მოგერინი

ევროკავშირის უმაღლესი წარმომადგენლის, ფედერიკა მოგერინის შეფასებით, დონალდ ტრამპის მიერ იერუსალიმის ისრაელის დედაქალაქად აღიარებას შეიძლება „შემაშფოთებელი გავლენა“ ჰქონდეს.

„ეს ძალიან მყიფე კონტექსტია და ამ აღიარებას შეუძლია, გადაგვისროლოს უფრო ბნელ ხანაში, ვიდრე ახლა ვცხოვრობთ“, - უთხრა იტალიელმა დიპლომატმა ჟურნალისტებს.

მან იმედი გამოთქვა, რომ სწორი გამოსავალი იქნება, თუ იერუსალიმი ორი სახელმწიფოს: ისრაელისა და პალესტინის დედაქალაქი გახდება.

„იმედი გვაქვს, რომ ისრაელსა და პალესტინას შორის კონფლიქტის ერთადერთი რეალისტური გადაწყვეტა არის ორი სახელმწიფოს მოდელი, სადაც იერუსალიმი იქნება როგორც ისრაელის, ასევე პალესტინის დედაქალაქი“,- მან დაამატა, რომ ამ საკითხზე უკვე ელაპარაკა აშშ-ის გენერალურ მდივან რექს ტილერსონს.

მოგერინიმ ივარაუდა, რომ „ეს მძიმე მომენტი მშვიდობის უფრო მყარ შეთანხმებამდე მიიყვანს“. მისი თქმით, კონფლიქტის მხარეებმა უნდა მოერიდონ შესაძლო ესკალაციას.

ევროკავშირის უმაღლესი წარმომადგენლის განცხადებით, „ყველაზე ცუდი, რაც შეიძლება ახლა მოხდეს, ესაა დაძაბულობის ესკალაცია წმინდა ქალაქის გარშემო და რეგიონში, რადგან, რაც ხდება იერუსალიმში მნიშვნელოვანია როგორც მთელი რეგიონისთვის, ასე მსოფლიოსთვის“.

ოთხშაბათს აშშ-ის პრეზიდენტმა დონალდ ტრამპმა იერუსალიმი ისრაელის დედაქალაქად აღიარა. გადაწყვეტილებას უკვე მოჰყვა საპროტესტო ტალღა მთელ მსოფლიოში.

ტრამპმა ასევე გასცა ბრძანება, რომ სახელმწიფო დეპარტამენტმა დაიწყოს აშშ-ის საელჩოს გადატანის პროცესი თელ-ავივიდან იერუსალიმში. აშშ-ის პრეზიდენტმა ამას უწოდა „ნაბიჯი სამშვიდობო პროცესების წინ წაწევისთვის“ ისრაელსა და პალესტინელებს შორის.

იერუსალიმის დიპლომატიური სტატუსისა და აშშ-ის საელჩოს ადგილმდებარეობის შეცვლით ტრამპმა შეასრულა კონგრესისი მიერ 1995 წელს აღებული ვალდებულება, ე.წ. „იერუსალიმის საელჩოს აქტი“, რომელიც ავალდებუებს ფედერალურ ხელისუფლებას, გადაიტანოს თავისი საელჩო წმინდა ქალაქში.

ანა მებურიშვილი