მსოფლიო

დონალდ ტრამპი რუსეთის წინააღმდეგ დაწესებულ სანქციებს უახლოეს პერიოდში არ გააუქმებს

ამერიკის 45-ე პრეზიდენტმა დონალდ ტრამპმა განაცხადა,რომ ამერიკის მხრიდან რუსეთის წინააღმდეგ დაწესებულ სანქციებს „რაღაცა დროით მაინც შეინარჩუნებს“.

ამის შესახებ ტრამპმა Wall Street Journal-თან ინტერვიუში განაცხადა.

ამასთან, ტრამპმა არ გამორიცხა სანქციების გაუქმება გარკვეული პირობების გათვალისწინებით.

მისი თქმით, შესაძლოა, სანქციები გააუქმოს, თუ მოსკოვი ტერორიზმთან ბრძოლასა და ამერიკისთვის მნიშვნელოვანი სხვა მიზნების შესრულებაში საკუთარ სარგებლობას დაამტკიცებს.

„თუ ჩვენ ვახერხებთ ურთიერთობის ნორმალიზებას, და თუ რუსეთი ჩვენ ნამდვილად გვეხმარება, თუ ვინმე ნამდვილად აკეთებს კარგ საქმეს, მაშინ რატომ უნდა შენარჩუნდეს სანქციები“,- განაცხადა დონალდ ტრამპმა.

მან რუსეთის პრეზიდენტთან ვლადიმირ პუტინთან შეხვედრის იმედი გამოთქვა, ასევე დასძინა, რომ იმედოვნებს ურთიერთობის გაუმჯობესებას არა მარტო რუსეთთან, არამედ ჩინეთთანაც, რომელსაც თავად წინასაარჩევნო კამპანიის დროს აკრიტიკებდა.

ინტერვიუს გამოქვეყნების დღეს, ცნობილი ხდება, რომ მოქმედმა პრეზიდეტმა რუსეთის წინააღმდეგ 2014 წელს დაწესებული სანქციები, კიდევ ერთი წლით გაახანგრძლივა.

მონიკა დავლიანიძე