მსოფლიო

დონალდ ტრამპი იმ ქვეყნებს დაემუქრა, ვინც აშშ-სგან ფინანსურ დახმარებას იღებენ

აშშ-ის პრეზიდენტი დონალდ ტრამპი ყველა იმ ქვეყანას დაემუქრა დაფინანსების შემცირებით, თუკი ისინი არ დაუჭერენ მხარს თეთრი სახლის გადაწყვეტილებას იერუსალიმთან დაკავშირებით.

„მე მომეწონა ნიკის [ნიკი ჰეილი - აშშ-ის მუდმივი წარმომადგენელი გაეროში] ნათქვამი გაეროში იმ ქვეყნებისადმი, ვინც ჩვენგან ფულს იღებს, მაგრამ მერე ჩვენ წინააღმდეგ აძლევენ ხმას უშიშროების საბჭოში ან პოტენციურად ასამბლეაში. ისინი ასობით მილიონს ან თუნდაც მილიარდს იღებენ, მაგრამ შემდეგ ჩვენ წინააღმდეგ აძლევენ ხმას. ჩვენ ვაკვირდებით ხმის მიცემას. დაე, ჩვენ წინააღმდეგ მისცენ ხმა, უფრო დავზოგავთ თანხებს. სულერთია ჩვენთვის“, -თქვა ტრამპმა.

მანამდე აშშ-ის მუდმივმა წარმომადგენელმა გაეროში ნიკი ჰეილიმ გააფრთხილა ორგანიზაციის წევრები, რომ დააკვირდება, როგორ მისცემენ ხმას ხუთშაბათისთვის დაგეგმილ გაეროს გენერალური ასამბლეის საგანგებო სხდომაზე, სადაც უნდა განიხილონ რეზოლუცია, რომელიც აკრიტიკებს აშშ-ის გადაწყვეტილებას იერუსალიმთან დაკავშირებით.

დეკემბრის დასაწყისში დონალდ ტრამპმა იერუსალიმი ისრაელის დედაქალაქად გამოაცხადა, რასაც დასავლელი პარტნიორებისა და ისლამური და არაბული ქვეყნების უკმაყოფილება მოჰყვა.

ანა მებურიშვილი