კომენტარი

დოკუმენტაციაში არსებული ხარვეზების გამო ავტობუსების შესაყვანად დაგეგმილი ტენდერი ჩაიშალა - კახა კალაძე

თბილისის მერი კახა კალაძე გამოეხმაურა „ნაციონალური მოძრაობის“ განცხადებას, რომლის თანახმად, დედაქალაქის მერიამ 45-მილიონიანი ტენდერი ჩაშალა, რომლის ფარგლებშიც თბილისში 100 ახალი ავტობუსი უნდა შემოეყვანათ. ოპოზიციის ინფორმაციით, მერიამ ვერ უზრუნველყო ვერცერთი ტენდერის გამართულად ჩატარება.

კახა კალაძემ ოპოზიციის ბრალდებებზე საპასუხოდ განაცხადა, რომ დოკუმენტაციაში არსებული ხარვეზების გამო ტენდერი ჩაიშალა.

„ტენდერის ჩავარდნას რაც შეეხება, გამარჯვებული კომპანია იყო მანი, თუმცა, გარკვეული ხარვეზები ჰქონდა დოკუმენტაციაში, რომელიც იყო წარმოდგენილი და შესაბამისად, ამის გამო მოხდა ტენდერის ჩაშლა და რამდენიმე დღეში ისევ გამოცხადდება. დაახლოებით, 90 ავტობუსზეა საუბარი ამ ეტაპზე, თუმცა, ვმუშაობთ ცენტრალურ ხელისუფლებასთან, პრემიერმინისტრთან და არ გამოვრიცხავ, რომ წელს კიდევ დამატებით გარკვეული რაოდენობები შევისყიდოთ“, -თქვა თბილისის მერმა.