კომენტარი

დოიაშვილს პოლიტიკაში მოსვლა თუ უნდა, შეუძლია, მიიღოს ეს გადაწყვეტილება - კახა კალაძე

შეიძლება, ადამიანს განსხვავებული შეხედულება ჰქონდეს, ეს ჩემთვის იმას არ ნიშნავს, რომ ჩვენ მტრები ვართ, – ამის შესახებ დედაქალაქის მერმა, კახა კალაძემ მედიასთან საუბრისას აღნიშნა, სადაც ის გამოეხმაურა ვასო აბაშიძის სახელობის მუსიკისა და დრამის თეატრის ხელმძღვანელის თანამდებობიდან დავით დოიაშვილის გათავისუფლების საკითხს.

კახა კალაძის თქმით, პოლიტიკურად განსხვავებული პოზიცია და პროტესტიც მისთვის მისაღებია, თუმცა სადაც ხარ, იქ უნდა იმუშაო და კონკრეტულ მიმართულებას მიხედო.

„განსხვავებული აზრი უამრავ ადამიანს შეიძლება ჰქონდეს. ჩემს უწყებაშიც არიან ადამიანები, რომლებსაც პოლიტიკურ საკითხებზე განსხვავებული მოსაზრება აქვთ. შეუძლებელია, რომ ყველას ერთნაირი აზრი ჰქონდეს. რაც შეეხება დოიაშვილის მოხსნას, არ ვიცი, ამის საფუძველი რა იყო. თუმცა რასაც ბოლო თვეების განმავლობაში ვუყურებ, ვიტყვი, რომ დოიაშვილს პოლიტიკაში მოსვლა თუ უნდა, შეუძლია, მიიღოს ეს გადაწყვეტილება. თუ ხარ იქ, სადაც ხარ, მაშინ უნდა იმუშაო და იმ კონკრეტულ მიმართულებას მიხედო. პროტესტი ნებისმიერ ადამიანს შეიძლება ჰქონდეს, მაგრამ ეს იმას არ ნიშნავს, რომ არ იმუშაო, არ გააკეთო შენი გასაკეთებელი.

წლების განმავლობაში დავით დოიაშვილი სხვადასხვა ტიპის ღონისძიებებს სათავეში ედგა. შეიძლება, ადამიანს განსხვავებული შეხედულება ჰქონდეს, ეს ჩემთვის იმას არ ნიშნავს, რომ ჩვენ მტრები ვართ. თქვენ ნუ უყურებთ იმ რადიკალურ დაჯგუფებებს, დღეს ქუჩაში რომ არიან წარმოდგენილი აგენტურის სახით“, – აღნიშნა კახა კალაძემ.

ცნობისთვის, საქართველოს კულტურის სამინისტრომ ვასო აბაშიძის სახელობის მუსიკალური კომედიისა და დრამის პროფესიული სახელმწიფო თეატრის ხელმძღვანელის თანამდებობიდან დავით დოიაშვილის გათავისუფლებასთან დაკავშირებით გუშინ განცხადება გაავრცელა. ცოტა ხნის შემდეგ დოიაშვილმა თეატრთან შეკრებილებს განუცხადა: „ყველაფერი ჩემთვის ნათელია, არ ვიცი, ხვალ მე რა პერფორმანსი, ან სპექტაკლი უნდა გავაკეთო, ან რა უნდა შევქმნა ამაზე დიდი, ვიდრე ის ისტორია, რაც მაჩუქა ღმერთმა“.

მოგვიანებით კი თეატრის დასის წევრებმა გაავრცელეს ერთობლივი განცხადება, რომელშიც აღნიშნავენ, რომ წინსვლასა და განვითარებას დავით დოიაშვილის ხელმძღვანელობის გარეშე ვერ ხედავენ.