მსოფლიო

დნესტისპირეთის საკითხის რეფერნდუმზე გადაწყდება - იგორ დოდონი

მოლდოვას პრეზიდენტის იგორ დოდონის განცხადებით, დნესტისპირეთის საკითხი საყოველთაო რეფერენდუმზე გადაწყდება.

ამის შესახებ დოდონმა კიშინიოვში, ქვეყნის პირველი პირის სტატუსით გამართული პირველი პრესკონფერენციის დროს განაცხადა.

„ვფიქრობ, დნესტიპირეთის საკითხის დარეგულირებაში პრეზიდენტს, პარლამენტსა და მთავრობას უთანხმოება არ უნდა ჰქონდეთ. უნდა მივიღოთ ისეთი პოლიტიკური გადაწყვეტილება, რომელიც საყოველთაო რეფერენდუმის დროს დამტკიცდება“,-აღნიშნა დოდონმა.

მოლდოვას პრეზიდენტმა ქვეყნის პარლამენტსა და მთავრობას მოლდოვას გაერთიანებისთვის „ერთიანი პლატფორმის“ შექმნა შესთავაზა.

მისი თქმით, არაღირებული დნესტიპირეთის ე.წ რესპუბლიკის ლიდერთან შეხვედრაზე კონკრეტული შედეგი იქნა მიღწეული: კერძოდ, დნესტისპირეთიდან გასვლის პროცედურა გამარტივდა, ასევე იგეგმება „დოკუმენტის პაკეტის ხელმოწერა, რომელიც უპასუხებს დნესტრის ორივე ნაპირზე მცხოვრები მოსახლეობის ინტერესებს“.

2016 წლის ოქტომბერში მოლდოვაში გამართული საპრეზიდენტო არჩევნების შედეგად პრორუსმა კანდიდატმა იგორ დოდონმა გაიმარჯვა.

იგორ დოდონი არჩევნებამდე არ მალავდა, რომ მისთვის რუსეთთან თანამშრომლობა პრიორიტეტს წარმოადგენდა. იგი აცხადებდა, რომ პრეზიდენტად არჩევის შემთხვევაში რუსეთთან ეკონომიკურ კავშირს სრული მოცულობით აღადგენდა, რეფერენდუმის ჩატარების გზით ევროკავშირთან ასოცირების შეთანხმებას გააუქმებდა და ქვეყანას მართლმადიდებლობაზე დაყრდნობით განავითარებდა.

ქვეყნის ლიდერად არჩევის შემდეგ, მან პირველი ვიზიტი სწორედ რუსეთში განახორიციელა.

გარდა ამისა, რამდენიმე კვირის წინ, დოდონმა განაცხადა, რომ ყირიმი დე-ფაქტო რუსეთის ნაწილია.

მონიკა დავლიანიძე