მსოფლიო

ჯიმ რიში გამორჩეული ადამიანი და ლიდერია, რომელიც არასდროს გაგიცრუებთ იმედს - ტრამპი Megobari Act-ის თანაავტორ სენატორზე

აშშ-ის პრეზიდენტი დონალდ ტრამპი სრულ მხარდაჭერას უცხადებს Megobari Act-ის თანაავტორ, საქართველოს მხარდამჭერ სენატორ ჯიმ რიშს. ამის შესახებ ტრამპი TruthSocial-ზე წერს.

“სენატორი ჯიმ რიში შესანიშნავ საქმეს აკეთებს აიდაჰოს საოცარი ხალხის წარმომადგენლად – შტატის, რომელიც მე ძალიან მიყვარს და სადაც დიდი უპირატესობით გავიმარჯვე 2016, 2020 და 2024 წლებში!

როგორც სენატის საგარეო ურთიერთობათა კომიტეტის თავმჯდომარე, ჯიმი დაუღალავად იბრძვის ჩვენი America First დღის წესრიგის გასატარებლად. ის შრომობს ჩვენი ეკონომიკის გასაზრდელად, შესანიშნავი სამუშაო ადგილების შესაქმნელად, ფერმერებისა და მეცხვარეების მტკიცე მხარდასაჭერად, ამერიკის ენერგეტიკული დომინაციის დასამკვიდრებლად, ჩვენი საზღვრის გასამაგრებლად, სამხედრო ძალისა და ვეტერანების გასაძლიერებლად, მუდმივად თავდასხმის ქვეშ მყოფი კონსტიტუციის მეორე შესწორების (იარაღის უფლებების) დასაცავად და სიძლიერის მეშვეობით მშვიდობის აღსადგენად.

სენატორ ჯიმ რიშს სრულად და უპირობოდ ვუჭერ მხარს ხელახალი არჩევისთვის – ის გამორჩეული ადამიანი და ლიდერია, რომელიც არასდროს გაგიცრუებთ იმედს!” - წერს ტრამპი.

ცნობისათვის, 27 მარტს, ამერიკის შეერთებული შტატების სენატის საგარეო საქმეთა კომიტეტი Megobari Act-ს განიხილავს.

22 მარტს, 20:00 საათზე, კი თბილისში Megobari Act-ის მხარდამჭერი მარში გაიმართება. მოქალაქეები მარჯანიშვილის მოედანზე შეიკრიბებიან და მსვლელობით პარლამენტისკენ წავლენ.