მსოფლიო

ჯანდაცვის მსოფლიო ორგანიზაციამ კორონავირუსის ეპიდემია გლობალურ საფრთხედ გამოაცხადა

ჯანდაცვის მსოფლიო ორგანიზაცია კორონავირუსის ეპიდემიას გლობალურ საფრთხედ აცხადებს, – ამის შესახებ ჯანდაცვის მსოფლიო ორგანიზაციის საგანგებო შეხვედრის შემდეგ ჟენევაში პრესკონფერენციაზე განაცხადეს.

როგორც ორგანიზაციის კომიტეტის წევრებმა აღნიშნეს, ვირუსის ადამიანიდან ადამიანზე გადაცემის პირველი შემთხვევა უხანში დადასტურდა, თუმცა ამ გზით გადაცემის უკვე რვა შემთხვევა დაფიქსირდა გერმანიაში, იაპონიაში, ვიეტნამსა და აშშ-ში.

ორგანიზაციის ინფორმაციით, არსებობს საფრთხე, რომ ვირუსი გავრცელდეს ჯანდაცვის სუსტი სისტემების მქონე ქვეყნებში.

ამასთან, ჯანდაცვის მსოფლიო ორგანიზაციის გენერალური დირექტორის, ტედროს ადანომის განცხადებით, მიუხედავად იმისა, რომ ინფიცირებულთა რაოდენობა ჩინეთთან შედარებით დანარჩენ მსოფლიოში გაცილებით დაბალია, „ახლა ჩვენ ყველამ ერთობლივად უნდა ვიმოქმედოთ, რათა შევზღუდოთ ვირუსის შემდგომი გავრცელება“. ადამონი ვირუსს „უპრეცედენტო ეპიდემიას“ უწოდებს, რომელსაც „უპრეცედენტო საპასუხო ზომები“ სჭირდება.

ახალი ტიპის კორონავირუსს 170 ადამიანი ემსხვერპლა. ბოლო მონაცემებით, ინფიცირებულია 7 834 ადამიანი, მათ შორის 7 736 დადასტურებული შემთხვევა დაფიქსირებულია ჩინეთში, 98 კი მსოფლიოს 18 ქვეყანაში.

ვირუსის ადამიანიდან ადამიანზე გადაცემის რვა შემთხვევა დასტურდება. მძიმე მდგომარეობაშია 1370 პაციენტი.

როდის მოხდა ასეთი რამ წარსულში?

ჯანდაცვის მსოფლიო ორგანიზაცია საზოგადოებრივი ჯანდაცვის საგანგებო მდგომარეობას საერთაშორისო საფრთხედ აცხადებს მაშინ, როდესაც არის რაიმე ექსტრაორდინარული მოვლენა, რომელიც დაავადების გლობალურად გავრცელების გამო რისკად გადაიქცა სხვა სახელმწიფოების საზოგადოებრივი ჯანდაცვისთვის.

საზოგადოებრივი ჯანდაცვის გლობალური საგანგებო მდგომარეობა წარსულში სულ ხუთჯერ არის გამოცხადებული:

ღორის გრიპი, 2009 — ვირუსი H1N1 მსოფლიოში 2009 წელს გავრცელდა, იმსხვერპლა 200 000-ზე მეტი ადამიანის სიცოცხლე. საგანგებო მდგომარეობის შემოღების მიზანი იყო ფრთხილი დაკვირვება ვირუსის გავრცელებაზე და საპასუხო ზომების მიღება, მათ შორის ვაქცინები.

პოლიომიელიტი, 2014 — მიუხედავად იმისა, რომ ეს დაავადება სრულ ამოძირკვამდე 2012 წელს ისე ახლოს იყო, როგორც არასდროს, ინფიცირების შემთხვევები 2013 წელს გახშირდა. საგანგებო მდგომარეობის შემოღების მიზეზი გახდა შიში, რომ მის ამოსაძირკვად მიმართული გლობალური ბრძოლა წარუმატებლობის წინაშე აღმოჩნდებოდა.

ზიკა, 2016 — ჯანდაცვის მსოფლიო ორგანიზაციამ ზიკა საზოგადოებრივი ჯანდაცვის გლობალურ საფრთხედ 2016 წელს მას შემდეგ გამოაცხადა, რაც დაავადება ამერიკის ორივე კონტინენტზე სწრაფად გავრცელდა. მიუხედავად იმისა, რომ ზიკას მრავალი სიმპტომი მსუბუქია, დაავადება ზედმეტად საშიშია ფეხმძიმე ქალებისათვის. საგაგნებო მდგომარეობის შემოღებით, ორგანიზაციამ მსოფლიოს გადაუდებელი კვლევების დაწყებისკენ მოუწოდა.

ებოლა, 2014 და 2019 — ეს მომაკვდინებელი დაავადება ორჯერ გამოცხადდა საზოგადოებრივი ჯანდაცვის საფრთხედ. პირველი შემთხვევა 2014 წლის აგვისტოდან 2016 წლის მარტამდე გაგრძელდა; დასავლეთ აფრიკაში დაინფიცირდა 30 000-ზე მეტი ადამიანი, 11 000-ზე მეტი კი დაიღუპა. ჯანდაცვის მსოფლიო ორგანიზაციამ მაშინ მდგომარეობის გამოცხადების მიზეზად დაასახელა „ვირუსის სისასტიკე, ინტენსიური საზოგადოება, ჯანდაცვის ობიექტებში გადადების მახასიათებლები და დაზარალებული ქვეყნების სუსტი სამედიცინო სისტემები“. მეორე საგანგებო მდგომარეობა გამოცხადდა შარშან, მას შემდეგ, რაც დაავადება კონგოს დემოკრატიულ რესპუბლიკაში გავრცელდა.

1tv.ge