კომენტარი

დიდმა პალატამ მკაფიოდ თქვა, რომ მერაბიშვილის დაკავება, წინასწარი პატიმრობა და სასამართლო პროცესი იყო კანონიერი - სოზარ სუბარი

ადამიანის უფლებათა ევროპული სასამართლოს დიდმა პალატამ მკაფიოდ თქვა, არანაირი პოლიტიკური მოტივი ვანო მერაბიშვილის პატიმრობაში არ იკვეთება, - განუცხადა ჟურნალისტებს ლტოლვილთა და განსახლების მინისტრმა სოზარ სუბარმა.

მისი თქმით, სტრასბურგის სასამართლოს გადაწყვეტილებას მერაბიშვილის პატიმრობასთან არანაირი საერთო არ აქვს და ყოფილი პრემიერის პატიმრობა არ გადაიხედება.

„დიდმა პალატამ რამდენიმე საკითხი უფრო მკაფიოდ გამოკვეთა, ვიდრე ეს იყო პირველ სასამართლოში. უფრო კონკრეტულად, 339-ე მუხლს თუ ჩახედავთ, გადაწყვეტილებაში მკაფიოდ თქვა, რომ არანაირი პოლიტიკური პატიმრობა მერაბიშვილთან დაკავშირებით არ დგინდება. მკაფიოდ თქვა, რომ მისი დაკავება, წინასწარი პატიმრობა და სასამართლო პროცესი, ეს ყველაფერი იყო კანონიერი.

რაც შეეხება მე-18 მუხლის დარღვევას, ამ მუხლთან დაკავშირებით დიდი პალატის ხმები გაიყო და 9 მოსამართლემ დაადგინა, რომ მერაბიშვილის საკნიდან გაყვანას ჰქონდა ადგილი, ხოლო 8 მოსამართლემ განსხვავებული აზრი დააფიქსირა, რომ მისი გაყვანა არ დგინდება. ამ 8 მოსამართლეს შორის არის დიდი პალატის თავმჯდომარე, რომელმაც დაადგინა, რომ გაყვანას ადგილი არ ჰქონია. ამ ყველაფრის მიუხედავად სასამართლომ თქვა, რომ ამას პოლიტიკურ მოტივებთან შეხება არ ჰქონია. სამწუხაროა, რომ ჩვენ ვერ შევძელით იმ 9 მოსამართლის დარწმუნება, რომლებმაც მიიჩნიეს, რომ მერაბიშვილის საკნიდან გაყვანის ფაქტს ადგილი ჰქონდა.

რას ვიზამთ, სასამართლოს გადაწყვეტილება არსებობს და ეს არანაირად არ ეხება პატიმრობის კანონიერებას და მით უმეტეს გათავისუფლებას“, - აცხადებს სუბარი.