მსოფლიო

დღეს სომხეთში პრემიერ-მინისტრის არჩევნები გაიმართება

დღეს სომხეთში პრემიერს ირჩევენ, გაირკვევა, დაუჭერს თუ არა მხარს ეროვნული კრება ოპოზიციონერი ლიდერის, ნიკოლ პაშინიანის ერთადერთ კანდიდატურას. ამასთან დაკავშირებით ერევნის რესპუბლიკის მოედანზე მოქალაქეები შეიკრიბნენ სომხეთის დროშის ფერის ბუშტებით.

შუაღამეს საპარლამენტო ოპოზიციური ფრაქცია „ელქის“ მიერ წარდგენილმა კანდიდატმა, ნიკოლ პაშინიანმა ფეისბუკვიდეოში განაცხადა, რომ მმართველი სომხეთის რესპუბლიკური პარტია ცდილობს, ჩაშალოს დღევანდელი არჩევნები.

„ახლახან შეგვატყობინეს, რომ სერჟ სარგსიანთან ღამით გამართული შეხვედრის დროს რესპუბლიკელებმა გადაწყვიტეს, ჩაშალონ პრემიერ-მინისტრის არჩევნები“, -აღნიშნა პაშინიანმა ვიდეომიმართვაში. მანამდე ის საუბრობდა, რომ მმართველი ფრაქციის წევრები არ აპირებენ, ხელი შეუშალონ „სახალხო კანდიდატის“ არჩევას.

ოპოზიციონერმა ლიდერმა მხარდამჭერებსა და ქვეყნის მოქალაქეებს მოუწოდა, დილით ადრე შეიკრიბონ რესპუბლიკის მოედანზე, რათა ხელი შეუშალონ სერჟ სარგსიანისა და რესპუბლიკური პარტიის გეგმას.

„დაჟინებით მოგიწოდებთ, დატოვეთ ყველა საქმე და დილაადრიან ასი ათასობით შეიკრიბეთ რესპუბლიკის მოედანზე“,-განაცხადა პაშინიანმა ვიდეომიმართვაში.

ვიდეომიმართვამდე ერთი საათით ადრე ეროვნული კრების ვიცე-სპიკერმა, რესპუბლიკური პარტიის პრესმდივანმა ედუარდ შარმაზანოვმა განაცხადა, რომ მმართველი გუნდი საბოლოო გადაწყვეტილებას მაშინ მიიღებს, როცა გაეცნობა პაშინიანის პროგრამას.

შეგახსენებთ, პრემიერ-მინისტრის არჩევნები მას შემდეგ დაინიშნა, რაც 23 აპრილს თანამდებობა დატოვა სერჟ სარგსიანმა. აღნიშნული გადაწყვეტილება მან ქვეყანაში მიმდინარე საპროტესტო აქციების ფონზე მიიღო.