კომენტარი

დეპუტატი გრიგოლ მიქელაძე რუსთავი 2-ის ეთერში გასულ სიუჟეტს ეხმიანება

სამტრედიის მაჟორიტარი დეპუტატის, გრიგოლ მიქელაძის სადეპუტატო ბიურო, 21 მაისს ტელეკომპანია რუსთავი 2-ის ეთერში გადაცემა “პოსტ სკრიპტუმში“ გასულ სიუჟეტთან დაკავშირებით დეპუტატის განცხადებას ავრცელებს.

,,21 მაისს, სამაუწყებლო კომპანია რუსთავი 2–ის გადაცემა ,,პოსტსკრიპტუმში“ გავიდა რეპორტაჟი, რომელშიც საუბარი იყო იმ დეპუტატების საქმიანობაზე და მათთვის ვითომდა სახელმწიფოს მხრიდან მინიჭებულ პრივილეგიებზე, რომლებმაც თავის დროზე ,,ქართულ ოცნებას“ გარკვეული თანხები შეწირეს. რეპორტაჟი ეყრდნობოდა ერთ–ერთი ოპოზიციური პარტიის მიერ ჩატარებულ ე. წ. კვლევას.

რეპორტაჟში ნახსენები იყო სამტრედიის მაჟორიტარი დეპუტატის გრიგოლ მიქელაძის სახელიც. კერძოდ, საუბარი იყო მიქელაძის მიერ ,,ქართული ოცნებისთვის“ შეწირულ 55 ათასი ლარზე, რის სანაცვლოდ თითქოს მან სახელმწიფოს მხრიდან ტენდერის გარეშე 12 ათასი ლარის ღირებულების მომსახურებაზე მიიღო დაკვეთა. რეპორტაჟის ავტორის ტექსტს სრულიად უკონტექსტოდ მოყვებოდა რესპონტენტის კომენტარი, სადაც ტენდერის დროს ფასთა კლების წესის დარღვევაზე და ამით სახელმწიფოსთვის მიყენებულ მილიონობით ლარის ზარალზე იყო საუბარი. მთლიანობაში რჩებოდა შთაბეჭდილება, რომ გრიგოლ მიქელაძე სახელმწიფოსგან გარკვეული პრივილეგიებით სარგებლობს და ამით ფინანსურ მოგებას იღებს.

დაბეჯითებით ვაცხადებთ, რომ გავრცელებული ინფორმაცია არის სრული სიცრუე. გრიგოლ მიქელაძე ნამდვილად გახლავთ შპს ,,ისნის სავაჭრო ცენტრის“ 51 % წილის მფლობელი, თუმცა ის არასდროს არ იღებდა მონაწილეობს კომპანიის მენეჯმენტში. სრული პასუხისმგებლობით გვინდა განვაცხადოთ, რომ მას შემდეგ, რაც გრიგოლ მიქელაძე დეპუტატი გახდა, შპს ,,ისნის სავაჭრო ცენტრს“ სახელმწიფო ტენდერი არ მოუგია. მეტიც, კომპანიის დაფუძნებიდან დღემდე სულ 8 ტენდერში მიიღო მონაწილეობა, საიდანაც 2015 წელში მხოლოდ ერთი ტენდერი მოიგო (გამოცხადებული სატენდერო ღირებულება 25000 ლარი, ვაჭრობის შედეგად ხელშეკრულელბა გაფორმდა 15349 ლარზე).

ისნის სავაჭრო ცენტრი გახლავთ სამშენებლო მასალების ჰიპერმარკეტი, სადაც შესაძლოა სხვადასხვა სახელმწიფო და საბიუჯეტო ორგანიზაციები მართლაც ახდენდნენ საჭირო მასალების შეძენას. ამის კონტროლის არც ვალდებულება და არც უფლება შპს ,,ისნის სავაჭრო ცენტრის“ მენეჯმენტს არ აქვს.
გრიგოლ მიქელაძემ ნამდვილად შეიტანა ,,ქართული ოცნების“ ანგარიშზე თანხა ჯერ კიდევ დეპუტატობის კანდიდატად დასახელებამდე, რაც, თავისთავად, მისი და ყველა ჩვენთაგანის მოქალაქეობრივი უფლებაა.

გრიგოლ მიქელაძე მრავალი წელია ბიზნეს საქმიანობას ეწევა და მისი საქმიანი რეპუტაცია არასდროს შელახულა. მის მიერ დაფუძნებული და მართული კომპანიები მაღალი სოციალური პასუხისმგებლობით გამოირჩევიან. წარმატებული ბიზნესმენის და უკვე პოლიტიკოსის გარდა, მას იცნობენ, როგორც ქველმოქმედ ადამიანს.

ვწუხვართ, რომ სამაუწყებლო კომპანია რუსთავი 2–ის რეპორტაჟმა, ნებსით თუ უნებლიედ, შელახა გრიგოლ მიქელაძის საქმიანი რეპუტაცია. ვიტოვებთ იმედს, რომ ეს არ გახლდათ შეგნებული ქმედება და მსგავსი რამ აღარ განმეორდება.

გრიგოლ მიქელაძის სადეპუტატო ბიურო ყოველთვის მზად იყო და არის მედიასთან თანამშრომლობისთვის’’, - ნათქვამია გრიგოლ მიქელაძის სადეპუტატო ბიუროს განცხადებაში.