კომენტარი

„დემირელის“ სკოლასთან დაკავშირებით არანაირი პოლიტიკური გადაწყვეტილება არ ყოფილა მიღებული - სოზარ სუბარი

საქართველოს ლტოლვილთა და განსახლების მინისტრის, სოზარ სუბარის თქმით, არც მუსტაფა ემრე ჩაბუქის დაკავებასთან და არც „დემირელის“ სკოლასთან დაკავშირებით არანაირი პოლიტიკური გადაწყვეტილება არ ყოფილა მიღებული.

ამის შესახებ სუბარმა „დემირელის“ სახელობის სკოლასთან დაკაშირებით დასმული კითხვის საპასუხოდ განაცხადა, რომელმაც ავტორიზაცია ვერ გაიარა.

მინისტრის თქმით, ეს წმინდა სამართლებრივი საკითხებია.

„არც მუსტაფა ემრე ჩაბუქის დაკავებასთან და არც „დემირელის“ სკოლასთან დაკავშირებით არანაირი პოლიტიკური გადაწყვეტილება არ ყოფილა მიღებული. ეს წმინდა სამართლებრივი საკითხებია. ყოველ შემთხვევაში, მე შემიძლია გითხრათ იმ საკითხზე, რომელზეც საქმის კურსში ვარ, ეს არის მუსტაფა ემრე ჩაბუქის დაკავებაზე. ჩვენ არ გვქონდა არანაირი უფლება, არ მოგვეხდინა რეაგირება თურქეთის სახელმწიფოს მოთხოვნაზე დაკავების მომენტში.

იქნება თუ არა საკმარისი მტკიცებულებები მის გადაცემაზე, ამას პროკურატურა და იუსტიციის სამინისტრო გაარკვევენ.

ლტოლვილის სტატუსის მინიჭებაზე წარდგენილი მტკიცებულებები არ ჯდებოდა ლტოლვილთა საერთაშორისო კონვენციით გათვალისწინებულ მოთხოვნებში. საქმე სასამართლოშია და არ მაქვს უფლება ვისაუბრო იმ გარემოებებზე, რატომ ეთქვა მას სტატუსის მინიჭებაზე უარი“, - განაცხადა სუბარმა.

მონიკა დავლიანიძე