კომენტარი

დეკანოზის ოჯახის წევრები პატრიარქთან შეხვედრას ადვოკატების თანდასწრებით ითხოვენ

ე.წ ციანიდის საქმეზე ბრალდებულის დეკანოზ გიორგი მამალაძის ოჯახის წევრები, პატრიარქთან შეხვედრას ადვოკატების თანდასწრებით ითხოვენ.

როგორც მედიასთან საუბარში მამალაძის ძმამ განაცხადა, ეს იმისთვის სჭირდებათ, რომ თუ პატრიარქს რამე კითხვები გაუჩნდება, ადვოკატებმა გასცენ პასუხი, რადგან ოჯახი საქმის დეტალებში ჩახედული არ არის.

„უწმინდესს რომ გაუჩნდეს კითხვები საქმესთან დაკავშირებით, მე პასუხს ვერ გავცემ, რადგან არ ვიცი დეტალები, ისე, როგორც ადვოკატებმა. გვინდა ჩვენი ყურით მოვისმინოთ უწმინდესის პოზიცია, მამა გიორგისთან მიმართებაში. შეხვედრა დაგეგმილი იყო ორშაბათს მხოლოდ ოჯახის წევრებთან, თუმცა მას შემდეგ, რაც ადვოკატებთან ერთად მოვითხოვეთ შეხვედრა, პასუხი არ მიგვიღია“,- ამბობს დეკანოზის ძმა თორნიკე მამალაძე.

ამასთან თორნიკე მამალაძე აკონკრეტებს, რომ მას სურს ძველი ადვოკატები იყვნენ შეხვედრაზე.

„ჩვენ გვინდოდა პატრიარქისგან კიდევ ერთხელ მოგვესმინა, რომ ის ენდობა გიორგი მამალაძეს, თუმცა მას შემდეგ, რაც მან ეს ერთხელ განაცხადა, იგი რაღაცნაიარად იზოლაციაში მოახვედრეს, მისი სახელით ედიშერ ქარჩავა ალაპარაკდა. შემდეგ აღმოჩნდა, რომ საპატრიარქო გაემიჯნა ქარჩავას განცხადებას. ამდენად, ჩვენ გვინდა ყველას დავანახოთ პატრიარქის პოზიცია. ქარჩავას და თეთრუაშვილს, ასევე მეუფე იაკობს უნდათ, რომ საზოგადოებაზე იმუშაონ და არ დაანახონ ხალხს, რომ საქმე მამა გიორგის მიმართ არის შეთითხნილი“, - განაცხადა თორნიკე მამალაძემ.

როგორც საზოგადოებრივს პროტოპრესვიტერმა გიორგი ზვიადაძემ დღეს განუცხადა, სრულიად საქართველოს კათოლიკოს-პატრიარქი ილია მეორე დეკანოზ გიორგი მამალაძის ოჯახის წევრებს შეხვდება.

მონიკა დავლიანიძე