მსოფლიო

დედა, ცოლი და შვილი მოვიყვანე, აინტერესებდათ, როგორ გამოიყურება კომედია - მიხეილ სააკაშვილი

კიევის სააპელაციო სასამართლოში უკრაინის გენერალური პროკურატურის საჩივრის განხილვა მიმდინარეობს. საქმე ეხება კიევის პეჩერსკის რაიონული სასამართლოს გადაწყვეტილებას, რომელმაც უარი თქვა ოდესის ყოფილი გუბერნატორისთვის, მიხეილ სააკაშვილისთვის აღკვეთის ღონისძიების სახით შინაპატიმრობის შეფარდებაზე.

ადვოკატების გარდა საქართველოს ექს-პრეზიდენტს თან ახლავს დედა გიული ალასანია, ცოლი სანდრა რულოვსი და უმცროსი შვილი ნიკოლოზი.

„აქ ჩემს ადვოკატებთან ერთად იმყოფებიან დედაჩემი, ჩემი ცოლი და ჩემი ვაჟი. მათ აინტერესებდათ, როგორ გამოიყურება ეს კომედია, რომელსაც აქ დგამენ“, - განაცხადა სააკაშვილმა.

მან ასევე წარადგინა უკრაინის პრეზიდენტის, პეტრო პოროშენკოს ბრძანება სააპელაციო სასამართლოების ლიკვიდირების შესახებ, რომლის მიხედვით ლიკვიდირებულია კიევის სააპელაციო სასამართლოც, სადაც გენპროკურატურის საჩივარს განიხილავენ.

„ჩემს სასამართლომდე ცოტა ხნით ადრე ეს სასამართლო იყო ლიკვიდირებული, ხოლო მოსამართლეებს დაპირდნენ, რომ „ხელახლა დანიშნავენ“. ამით ყველაფერია ნათქვამი“, - განაცხადა სააკაშვილმა.

ანა მებურიშვილი