კომენტარი

დავით ნარმანია კვლავ აპირებს ბიუჯეტიდან ასეულობით ათასი ლარის გაფლანგვას - ირაკლი ნადირაძე

თბილისის საკრებულოს ფრაქცია ნაციონალური მოძრაობის წევრის ირაკლი ნადირაძის განცხადებით, 2017 წლის დედაქალაქის ბიუჯეტი ორიენტირებულია „მხოლოდ „ქართული ოცნების“ მაღალჩინოსნების კეთილდღეობაზე“.

„ასევე ორიენტირებულია მხოლოდ იმაზე, თუ წინასაარჩევნოდ მათ როგორ მოისყიდონ ამომრჩეველი და როგორ შეინარჩუნონ საკუთარი სკამები და თანამდებობები“,-აღნიშნა საკრებულოს დეპუტატმა.

მისი თქმით, მაშინ როდეასც არაფერი კეთდება ჯანდაცვის მიმართულებით, საცობების მიმართულებით, დედაქალაქის მერი ბიუჯეტიდან აპირებს ასეულობით ათასი ლარის გაფლანგვას.

„მაშინ როდესაც მცირდება ჯანდაცვის მიმართულება, სოციალური მიმართულება, არაფერი კეთდება საცობების მიმართულებით, მცირდება ავარიული კორპუსების დაფინანსება, არაფერი კეთდება მეწარმეობის და ეკონომიკის მხარდასაჭერად - დავით ნარმანია, თბილისის ბიუჯეტიდან კვლავდაკვლავ აპირებს, რომ გაფლანგოს ასეულობით ათასი ლარის ოდენობით თანხები, ისევ რესტორნებისთვის, ფურშეტებისთვის, ე.წ ტრენინგებისთვის და სხვა მსგავსი ტიპის არასაჭირო ღონისძიებებისთვის. დავით ნარმანია უკვე დაგვცინის საერთოდ და მილიონი ხის შემდგომ აპირებს, რომ თურმე, ერთი მილიონი ყვავილი დარგოს მომავალ წელიწადს, ანუ ეს ადამიანი საერთოდ გასულია მომსახურების ზონიდან“,- აღნიშნა ნადირაძემ.

მონიკა დავლიანიძე