კომენტარი

დავით ბაქრაძე- ირაკლი კობახიძეს: ჩვენ მზად ვართ მხარი დაგიჭიროთ

ნაციონალური მოძრაობის ლიდერი დავით ბაქრაძე პარლამენტის თავმჯდომარეობის კანდიდატს ირაკლი კობახიძეს მხარს დაუჭერს, როდესაც მისი ქმედება ხალხის უკეთესი მომავლისკენ იქნება მიმართული.

ამის შესახებ ბაქრაძემ მეცხრე მოწვევის პარლამენტში პირველ სესიაზე სიტყვით გამოსვლის დროს განაცხადა.

ბაქრაძის თქმით, მას კოლეგების სკეპსისის ირაკლი კობახიძის წარსულთან დაკავშირებით ესმის, თუმცა „გულწრფელად გეტყვით, მე მინდა, რომ საქართველოს პარლამენტს ჰყავდეს კარგი თავმჯდომარე“.

„იმიტომ, რომ კარგი თავმჯდომარე არ სჭირდება უმრავლესობას. 118-კაციან უმრავლესობას სჭირდება ადამიანი, რომელიც უბრალოდ ჩაქუჩს დაარტყამს და მიკროფონში ილაპარაკებს. კარგი თავმჯდომარე სჭირდება ოპოზიციას, სჭირდება პარლამენტს და სჭირდება საქართველოს. ამიტომ, მიუხედავად ყველაფრისა, მე მინდა იმედი მქონდეს, რომ საქართველოს პარლამენტს ეყოლება კარგი თავმჯდომარე, რომელიც შეძლებს იმუშაოს ყველა პოლიტიკურ ძალასთან, რომელიც იქნება მიმართული კომპრომისზე, გამთლიანებაზე და პოლიტიკური სისტემის გაჯანსაღებაზე. იცოდეთ, რომ ნებისმიერ ნაბიჯში, მიუხედავად იმისა,რომ ჩვენ ვართ მწვავე და კრიტიკული, ნებისმიერ ნაბიჯში, რომელიც ჩვენ ჩავთვლით, რომ მიმართულია ქვეყნის, პარლამენტის და ხალხის უკეთესი მომავლისკენ, ჩვენ მზად ვართ მხარი დაგიჭიროთ. და მე არც ამისი კომპლექსი არ მაწუხებს, იმიტომ რომ არც მართული ოპოზიცია ვარგა, და არც ისეთი ოპოზიცია, რომელიც არაფერს არ ხედავს და მარტო არეულობა და დაპირისპირება უნდა“,-განაცხადა ბაქრაძემ.

მონიკა დავლიანიძე