კომენტარი

დათო უსუფაშვილი იყო უფრო სახელისუფლებო კოალიციური პასუხისმგებლობის მქონე პოლიტიკური ლიდერი - დავით ბერძენიშვილი

რესპუბლიკური პარტიის ერთ-ერთი ლიდერი დავით ბერძენიშვილი პარტიის ყოფილ თავმჯდომარეს დავით უსუფაშვილს, 2005-2012 წლებში რესპუბლიკური პარტიის ღირსეული თავმჯდომარეობისთვის მადლობას უხდის.

როგორც ბერძენიშვილმა „ტვ პირველის“ ეთერში განაცხადა, ოპოზიციონერი ლიდერი დავით უსუფაშვილი იყო ძალიან მნიშვნელოვანი ფიგურა რესპუბლიკური პარტიისთვის, მისი დამსახურება არის, რომ რესპუბლიკური პარტია მთელი ქვეყნის მასშტაბით გახდა წამყვანი პოლიტიკური ორგანიზაცია.

„რაც შეეხება დათო უსუაფშვილს ბიძინა ივანიშვილის კოალიციის გამარჯვების შემდეგ და რესპუბლკიკურ პარტიას 2012 წლის არჩევნების შემდეგ. ჩვენ ყოველთვის ვახერხებდით, რომ კოალიციასთან კორექტული ურთიერთობები გვქონოდა, კორექტული პოლიტიკური ურთიერთობები, განსხვავებული სასტარტო პოზიციებიდან გამომდინარე, მაგრამ ჩვენ ნაბიჯებს ერთმანეთისკენ ვდგამდით. დათო უსუფაშვილი იყო უფრო სახელისუფლებო, კოალიციური პასუხისმგებლობის მქონე პოლიტიკური ლიდერი და იქედან უყურებდა რესპუბლიკური პარტიის როლს და ადგილს კოალიციაში. მე და რამდენიმე ადამიანი კი, ყოველთვის ვცდილობდით, რესპუბლიკური პარტიის სახის შენარჩუნებას“,-განაცხადა ბერძენიშვილმა.

მისი თქმით, დავით უსუფაშვილმა მისი პარლამენტის თავმჯდომარეობის დროს განაცხადა, რომ ბოლომდე იქნებოდა რესპუბლიკელი, თუმცა ეს დაპირება ვერ შეასრულა.

„მთავარი ფრაზა, რაც დათო უსუფაშვილმა თქვა პარლამენტის თანამჯდომარეობის დროს იყო რესპუბლიკური პარტიის და კოალიცია „ქართული ოცნების“ურთიერთობის დამახასიათებელი მთავარი სტრატეგიული ფორმულა: „მე, ჩემი პოლიტიკური ცხოვრების ბოლო წუთამდე ვიქნები რესპუბლიკელი“. ძალიან სამწუხაროა, რომ ვითარება ასე წავიდა, რომ მან ვერ შეძლო მისი პოლიტიკური ცხოვრების ბოლო წუთამდე დარჩენილიყო რესპუბლიკური პარტიის წევრი. ვერ ვიტყვი, რომ მისი გადაწყვეტილებით გაოგნებული და ნაწყენი არ დავრჩი მეთქი“,-აღნიშნა ბერძენიშვილმა.

მონიკა დავლიანიძე