კომენტარი

დარწმუნებული ვიყავი ოთო აბესაძეზე, რომ ის რაღაცას მაიმუნობდა - ალეკო ელისაშვილი

თბილისის მერობის დამოუკიდებელი კანდიდატის, ალეკო ელისაშვილის თქმით, იგი დარწმუნებული იყო, რომ თბილისის მერიის თანამშრომელი ოთარ აბესაძე „რაღაცას მაიმუნობდა“.

ამის შესახებ ელისაშვილმა ქრთამის აღების ბრალდებით დაკავებული აბესაძის საკითხის კომენტირებისას განაცხადა.

მერობის კანდიდატი განმარტავს, რომ აბესაძე არა უბრალო თანამშრომელი იყო, არამედ იგი მოქმედი მერის დავით ნარმანიას მეგობარი და საკრებულოში მისი პირადი წარმომადგენელია.

„ოთო აბესაძე იყო არა რიგითი თანამშრომელი მერიის, არამედ თბილისის მერის პირადი წარმომადგენელი საკრებულოში, შესაბამისად იყო მაღალჩინოსანი. ამასთან ერთად, ის დავით ნარმანიას პირადი მეგობარია, და აღმოჩნდა, რომ ასეთი ადამიანი იყო ჩართული კორუფციაში. ყოველთვის ვამბობდი, რომ მერიის სტრუქტურები არის გახრწნილი კორუფციით. გადაყწვეტილებას ვინც იღებს, მათი უმეტესობა, არიან მექრთამეობაში ჩართულები. მე ოპერატიული მუშაკი არ ვარ, რომ ფაქტზე დამეჭირა სხვები, თორემ დარწმუნებული ვიყავი ოთო აბესაძეზე, რომ ის რაღაცას მაიმუნობდა. არ მინდა უდანაშაულობის პრეზუმციის დარღვევა, თუნდაც ოთო აბესაძის, მაგრამ ყველა არის ამაში ჩართული. ეს არის ფაქტი და ეს არის კიდევ ერთი დადასტურება. რამდენი ადამიანი უნდა დაიჭირონ?! ამას გავიძახი სულ, რომ „ქართული ოცნება“ არის გახრწნილი თავიდან ბოლომდე კორუფციით“,-აღნიშნა ალეკო ელისაშვილმა.

ოთარ აბესაძე მდინარე მტკვარზე, ტივზე არსებული კაფის და შესაბამისი ინფრასტრუქტურის მოწყობისათვის, საქართველოს მოქალაქეებს საჭირო ნებართვების დაჩქარებული წესით აღებაში დახმარებას დაჰპირდა, რის სანაცვლოდაც ქრთამის სახით 3000 აშშ დოლარის გადახდა მოითხოვა.

გამოძიება, სსკ-ის 338-ე მუხლის პირველი ნაწილით გათვალისწინებული დანაშაულის ნიშნებით მიმდინარეობს, რაც სასჯელის სახით ექვსიდან ცხრა წლამდე თავისუფლების აღკვეთას ითვალისწინებს.

მონიკა დავლიანიძე