კომენტარი

დამტკიცენული ტარიფი იძლევა იმის საშუალებას, რომ ენერგომომარაგება ქალაქში იყოს სტაბილური და საიმედო - ,,თელასის“ წარმომადგენელი

კომპანია „თელასის“ კომერციული დირექტორის მოადგილე მიხეილ ანთაძე აცხადებს, რომ სემეკის მიერ დღეს დამტკიცებული ელექტროენერგიის ტარიფი ენერგოკომპანიას სწრაფი განვითარების საშუალებას არ აძლევს.

როგორც მიხეილ ანთაძემ ჟურნალისტებს ელექტროენერგიის საფასურის 1,5 თეთრით გაზრდის კომენტირებისას განუცხადა, გაზრდილი ტარიფი იძლევა იმის საშუალებას, რომ ენერგომომარაგება დედაქალაქში იყოს სტაბილური და საიმედო, თუმცა კომპანიას არ ეძლევა საშუალება იფიქროს სამომავლო განვითარებაზე.

„გვაქვს კონკრეტული შენიშვნები და მოსაზრებები. მთავარი, რაშიც არ ვეთანხმებით მარეგულირებელ კომისიას გახლავთ ის, რომ კომისია არ ითვალისწინებს კომპანიის სახეცვლილებას ბოლო წლების განმავლობაში. 2014 წლიდან დღემდე სახეზე გვაქვს აბონენტების და ქსელის მნიშვნელოვანი ზრდა, ეს იმ პირობებში, როცა, პრაქტიკულად, არ მომხდარა პერსონალის ზრდა. უფრო მეტიც, მოხდა პერსონალის შემცირება. ეს იმას ნიშნავს, რომ „თელასის“ თანამშრომლები დღეს უფრო დატვირთულები არიან, ვიდრე ბოლო წლების განმავლობაში. ტარიფი იძლევა იმის საშუალებას, რომ ენერგომომარაგება ქალაქში იყოს სტაბილური და საიმედო, მაგრამ არ გვაძლევს საშუალებას, სრულად ვიფიქროთ კომპანიის განვითარებაზე იმ ტემპებით, რომელიც ჩვენ გვაქვს გათვალისწინებული“, - განაცხადა მიხეილ ანთაძემ.

თუმცა, კომპანიის წარმომადგენელს არ დაუკონკრეტებია, რამდენი თეთრით სურდა კომპანიას ელექტროენერგიის საფასურის გაზრდა.