კომენტარი

ჩვენთვის მთავარი არის საზოგადოების ინტერესი და ამ შემთხვევაში დაზარალებულის, ბატონი ზაზას ინტერესი - ანრი ოხანაშვილი

ხორავას ქუჩაზე მოზარდების მკვლელობის საქმის შემსწავლელი დროებითი საგამოძიებო კომისიის საპარლამენტო უმრავლესობის წევრი ანრი ოხანაშვილი ერთ-ერთი მოკლული მოზარდის მამის, ზაზა სარალიძის განცხადებას გამოეხმაურა.

სარალიძემ განაცხადა, რომ უმრავლესობის წევრთა მიერ მომზადებული დასკვნა მისი შვილის მკვლელებს ხელს აფარებს, რაც ოხანაშვილმა გამორიცხა.

„ჩვენ არ ვართ ის ხელისუფლება და ჩვენთვის მთავარი არის საზოგადოების ინტერესი და ჩვენთვის მთავარი არის დაზარალებულის, ამ შემთხვევაში ბატონი ზაზას ინტერესი. ჩვენ არაფრის ფასად არ გვიღირს, რომ ამ ადამიანის იმედები გავაცრუოთ. მთავარია, მას ჰქონდეს ნდობა და რწმენა, რომ ჩვენი მთავარი ამოცანაა ობიექტურ მოცემულობაზე დაყრდნობით მსჯელობა და არა ემოციებითა და საზოგადოებაზე გარკვეული მანიპულირებით, ან თუნდაც დაზარალებული ოჯახების შეცდომაში შეყვანით ასეთი დასკვნის დაწერა“, -თქვა ოხანაშვილმა.

ზაზა სარალიძემ კომისიის საპარლამენტო უმრავლესობის წევრთა მიერ მომზადებული დასკვნა სამარცხვინო უწოდა და 10 სექტემბრიდან აქციების დაწყება დააანონსა.

ცნობისთვის, ხორავას ქუჩაზე მომხდარი მკვლელობის საქმეზე შექმნილმა პარლამენტის საგამოძიებო კომისიამ ხმათა უმრავლესობით „ევროპული საქართველოს“ მიერ მომზადებული დასკვნა გუშინ დაამტკიცა.

67-გვერდიან დასკვნას კომისიის ცხრა წევრმა - თავად „ევროპული საქართველოს“ წარმომადგენლებმა დაუჭირეს მხარი.

„ქართული ოცნების“ დასკვნის ვარიანტს კი, კომისიაში „ქართული ოცნების“ უმრავლესობის ოთხმა დეპუტატმა დაუჭირა მხარი.

საგამოძოებო კომისიის დასკვნა ჯერ პარლამენტის ბიუროს წარედგინება და შემდგომ მსჯელობისათვის პარლამენტის პლენარულ სხდომაზე გავა.

ხორავას ქუჩაზე მე-11 კლასის მოსწავლეები ლევან დადუნაშვილი და დავით სარალიძე 1-ელ დეკემბერს მოკლეს.