კომენტარი

ჩვენი თანამებრძოლების დაკავება ჩვენი დაშინების მცდელობაა - ზაალ უდუმაშვილი

თბილისის საქალაქო სასამართლო, „ნაციონალური მოძრაობის“ გუშინდელ აქციაზე დაკავებული ექვსი პირის ადმინისტრაციულ სასჯელზე მსჯელობს.

სასამართლოსთან პარტიის წევრები და თბილისის მერობის კანდიდატი ზაალ უდუმაშვილი არიან შეკრებილი.

უდუმაშვილის შეფასებით, გუშინ სამართალდამცველების მხრიდან იყო დარღვევა, რისი მოწმეც თავად არის.

მისივე თქმით, ის რაც ხდება საქალაქო სასამართლოში, არის „ნაციონალური მოძრაობის“ დაშინების მცდელობა.

„სამართალდამცველების მხრიდან რომ იყო დარღვევა ამის მომსწრე მე ვარ, იქ ვიყავი და ყველაფერს ჩემი თვალით ვხედავდი. ან როგორ იტაცებდნენ, ან როგორ იპარავდნენ, როგორ აგდებდნენ მანქანაში. ორი ადამიანის გადაყვანა გახდა საჭირო იზოლატორიდან საავადმყოფოში, იმდენად ცუდად გახდნენ. ეს კიდევ ცალკე მოკვლევის თემა უნდა გახდეს, თუ რა მოხდა იმ პერიოდში, როდესაც ისინი გადაყავდათ იზოლატორში. მათ მიიღეს ძალიან სერიოზული ფიზიკური დაზიანებები და დღეს ეს სახალხო დამცველმა თავის გამოსვლაში ახსენა.

ეს არის ე.წ დაშინების მცდელობა, ჩემი თანამებროძელების დაკევებით, რომ დაგვაშინონ. თუმცა მე შემიძლია პირდაპირ ვუთხრა ხელისუფლებას,რომ ამით კი არ გვაშინებთ, არამედ გვაძლიერებთ, იმიტომ რომ თითოეულ ჩვენს დაკავებულზე ათჯერ მეტი ადამიანი გამოვა ქუჩაში მათ დასაცავად და თბილისელების უფლებების დასაცავად, რასაც ემსახურებოდა გუშინდელი ჩვენი აქცია“,-განმარტა უდუმაშვილმა.

მონიკა დავლიანიძე