კომენტარი

ჩვენი პრობლემა ზოგადად, საზოგადოების, არის ტყუილი და ტყუილის ტირაჟირება - მამუკა ხაზარაძე ზაზა ოქუაშვილის ბრალდებებს პასუხობს

„თიბისი“ ბანკის დამფუძნებელი მამუკა ხაზარაძე გამოეხმაურა „ომეგა ჯგუფისა“ და „იბერია ტვ“-ის მფლობელის, ზაზა ოქუაშვილის ბრალდებას, რომ მის მიერ გადარიცხული 4 მილიონის გატანა საღამოს, არასამუშაო საათებში მოხდა მთელი რიგი პროცედურების დარღვევით.

„ჩვენი ბანკი 10 წელია, მუშაობს 20:00 საათამდე. შეგიძლიათ, დეტალურად ნახოთ ყველა პროცედურა და სისულელეებზე არ მინდა რაღაც კომენტარების გაკეთება. ბანკი არის სერვისის კომპანია. თუ თქვენ კომპანიას ხსნით, თუნდაც 20 წუთით ადრე, გაქვთ ფული და თქვენი დირექტორი აკეთებს მოთხოვნას, ბანკი ვალდებულია, თანხა გაატანოს. რა შუაშია, რამდენი დღის დაფუძნებულია კომპანია, თუ რეგისტრირებულია და ყველაფერი ბანკში წარმოდგენილი. ეს არის მთელი ამბავი. კიდევ ერთხელ ვიმეორებ, ცილისწამებას უნდა შევეშვათ ყველა“, – განაცხადა ხაზარაძემ.

ბანკის მფლობელის განცხადებით, საზოგადოების პრობლემაა ტყუილის ტირაჟირება.

„ჩვენი პრობლემა ზოგადად, საზოგადოების, არის ტყუილი და ტყუილის ტირაჟირება, მოვუწოდებ ყველას, რომ იყვნენ გულწრფელები და თავის პრობლემები არ გადაიტანონ სხვაზე.

ყველაფერი გაკეთდა კანონის შესაბამისად და დანარჩენს ჩვენი იურისტები იტყვიან“, -თქვა ხაზარაძემ.

ოქუაშვილის განცხადებით,მან ბიძინა ივანიშვილის მოთხოვნის შემდეგ 4 მილიონი ოფშორში 1 დღის დაფუძნებული კომპანიის ანგარიშზე ჩარიცხა. ასეთი თანხის მოკლე ვადებში განაღდებას კი კანონი კრძალავს. ოქუაშვილი იმედოვნებდა, რომ დროს მოიგებდა და ივანიშვილი ფულის გატანას ვერ მოახერხებდა, თუმცა მისი განცხადებით, ხელისუფლების წარმომადგენლებმა მოახერხეს ის, რომ ბანკის სამეთვალყურეო საბჭოს თავმჯდომარე და დირექტორი ბორჯომიდან ჩამოეყვანათ და თანხა არასამუშაო დროს გაეცათ.