კომენტარი

ჩვენ წესად გვაქვს აღებული, რომ არ ვეუბნებით კომპანიებს, რამდენი უნდა ვაპატიოთ - ივანე მაჭავარიანი

ვერც ერთ კომპანიას ვერ დამისახელებთ, ვისაც ჩვენ საგადასახადო შეთანხმებას ვუკეთებთ და ჩვენ ვეუბნებოდით ციფრებს, - ამის შესახებ ჟურნალისტებს ფინანსთა მინისტრმა, ივანე მაჭავარიანმა " ომეგა ჯგუფის" თემაზე საუბრისას განუცხადა.

"როდესაც მიგვაჩნია, რომ არ არის საკმარისი თანხა, ჩვენ ვეუბნებით კომპანიას - წაბრძანდით, გადახედეთ და ბევრი შემთხვევა ყოფილა, რომ კომპანიები მობრუნებულან ახალი, უფრო კარგი შეთავაზებით ბიუჯეტისთვის და ჩვენ დავთანხმებულვართ. ჩვენ წესად გვაქვს აღებული, რომ არ ვეუბნებით კომპანიებს, რამდენი უნდა ვაპატიოთ, თუმცა ჩვენ ვეუბნებით, თუკი თანხა მიუღებელია. ეს საუბარი იყო სწორედ და ამას ვცდილობდი ზუსტად, "ომეგასთვის" გამეგებინებინა, რომ აქვს პერსპექტივა თქვენს შემოთავაზებას, რომ წავიდეთ საგადასახადო შეთანხმებით. ოღონდ ეს უნდა იყოს საღ აზრთან ახლოს. ამას ვეუბნებოდი მანამდეც შეხვედრაზე, ჩაწერითაც და ჩაწერის გარეშეც. ამას ვეუბნები დღესაც“, - აღნიშნა ივანე მაჭავარიანმა.

,,ომეგა ჯგუფის“ ხელმძღვანელობაზე საუბრისას, ფინანსთა მინისტრმა აღნიშნა, რომ ,,ერთ-ერთ გამოსავლად შეიძლება ჩაითვალოს საგადასახადო შეთანხმება, რომლითაც ისინი თვითონ მოვიდნენ.“

მისივე თქმით, საგადასახადო შეთანხმება ფორმდება ათეულ კომპანიასთან.

"ჩვენ ალბათ ყოველთვიურად რამდენიმე ათეულ, ასეულთან თუ არა, კომპანიასთან ვაფორმებთ საგადასახადო შეთანხმებას და როგორც წესი, საურავებს ვპატიობთ და ზოგ შემთხვევაში ძირსაც ვუმცირებთ. ზუსტად ის, რომ არც ადრე, როდესაც "ომეგას " თემა გააქტიურდა, არც ახლა ეს თემა არაა პოლიტიკური, ადასტურებს, რომ მიუხედავად ამდენი სიბინძურის, ამდენი ტყუილისა, ჩვენ მაინც შევხვდით კომპანიის წარმომადგენლებს. ზუსტად ვიცოდი, რომ გვწერდნენ, მაგაში ეჭვი არავის ეპარებოდა. ზუსტად ვეუბნებოდით, რომ კი ბატონო საურავის ჩამოწერის შანსი მაღალია, ძირზეც შეიძლება ვისაუბროთ, ოღონდ არა იმ დოზით და არა იმ რაოდენობით, რომ 50 მილიონიდან 40 მაჩუქე და 10 დამიტოვეთ, ამიტომ ვთხოვეთ, გადახედათ გრაფიკისთვის და ხელახლა მოსულიყვნენ“, - აღნიშნა ფინანსთა მინისტრმა, ივანე მაჭავარიანმა.