კომენტარი

ჩვენ მოქალაქეებს, რომლებსაც უწევთ დგომა საზღვარზე, მაქსიმალურად ვაწვდით წყალს, რომ არ შეწუხდნენ - დიმიტრი ქუმსიშვილი

საქართველოს ფინანსთა მინისტრის, დიმიტრი ქუმსიშვილის განცხადებით, სარფის საბაჟოზე საქართველოს მხრიდან რიგები არ არის.

როგორც ქუმსიშვილმა საკითხის კომენტირებისას აღნიშნა, სარფის საბაჟოზე ჩართულია ონლაინ კამერები და ყველა დაინტერესებულ ადამიანს შეუძლია, ნახოს, რა ხდება საქართველოს მხარეს.

"ჩვენ მოქალაქეებს, რომლებსაც უწევთ დგომა საზღვარზე, მაქსიმალურად ვაწვდით წყალს, რომ არ შეწუხდნენ. ჩემს პირველ მოადგილეს ჰქონდა შეხვედრა თურქეთის ელჩთან ამ საკითხთან დაკავშირებით. შეხვედრა იქნება უკვე საბაჟოს ხელმძღვანელების დონეზე, რათა თურქულმა მხარემ მაქსიმალურად დააჩქაროს თავის მხარეს მიმდინარე სარეკონსტრუქციო სამუშაოები. საბოლოო ჯამში, ჩვენ თურქულ მხარესთან ვთანამშრომლობთ, თუმცა რა თქმა უნდა, ხანდახან ხდება ისე, რომ მშენებლობის პროცესში მათ მხარეს შეიძლება იყოს შეფერხება. თანამშრომლობა თურქულ მხარესთან გვაქვს ყოველდღიური. ჩვენი მხრიდან ყველა ნაბიჯი გადადგმულია. ჩვენ ჩვენს მოქალაქეებს მაქსიმალურად ვეხმარებით", - განაცხადა დიმიტრი ქუმსიშვილმა.

ცნობისათვის, სარფის საბაჟოზე პრობლემები იყო. სარფში შეკრებილები ირწმუნებოდნენ, რომ თურქი მებაჟეები ნეიტრალური ზონიდან უკან ახსნა-განმარტების გარეშე აბრუნებენ და რამდენიმედღიან შეზღუდვას უწესებენ.

ნინო ექვთიმიშვილი