კომენტარი

ჩემთვის დღემდე პასუხგაუცემელია კითხვა, რა არგუმენტით წავიდა პრემიერ-მინისტრი - გიორგი მარგველაშვილი

მნიშვნელოვანია საზოგადოებამ იცოდეს, რა პრინციპით გვყავს ან აღარ გვყავს უმაღლესი თანამდებობის პირები, - განუცხადა ჟურნალისტებს პრეზიდენტმა გიორგი მარგველაშვილმა აჭარაში, სადაც კონსულტაციები გამართა აჭარის ავტონომიური რესპუბლიკის მთავრობის თავმჯდომარის კანდიდატურასთან დაკავშირებით აჭარის უმაღლეს საბჭოში შემავალი ოპოზიციური პარტიების წევრებთან.

მარგველაშვილი კიდევ გამოეხმაურა პრემიერის თანამდებობიდან გიორგი კვირიკაშვილის გადადგომის საკითხს და აღნიშნა, რომ მსგავსი კითხვები ისმის ზურაბ პატარაძის მიერ აჭარის მთავრობის თავმჯდომარის თანამდებობის დატოვებასთან დაკავშირებით.

„ყველა ოპოზიციურმა პარტიამ, მიუხედავად იმისა, რომ სხვადასხვა პოლიტიკურ პლატფორმაზე არიან, ერთნაირად გამოხატეს აღშფოთებაც და შეშფოთებაც პოლიტიკიდან პრემიერ-მინისტრის და შემდეგ რეგიონის ხელმძღვანელის ასე წასვლის თაობაზე. შინაარსი რაშია? ოპოზიცურ პარტიებს შეიძლება ძალიან არ მოსწონდათ და არ იყვნენ მათი მხარდამჭერები, მაგრამ პოლიტიკური თანამდებობიდან წასვლა ისე, რომ არ უხსნი საზოგადოებას რატომ მიდიხარ, ერთი მხრივ შეურაცხმყოფელია, ხოლო მეორე მხრივ, არის დემოკრატიული პოლიტიკური პროცესის საწინააღმდეგო.

ასე რომ, ჩემთვის დღემდე პასუხგაუცემელია კითხვა, რა არგუმენტით წავიდა პრემიერ-მინისტრი, რა იყო ასეთი მნიშვნელოვანი გადაწყვეტილების საფუძველი“, - განაცხადა გიორგი მარგველაშვილმა.

ჟურნალისტები დაინტერესდნენ, დაურეკა თუ არა გიორგი კვირიკაშვილს, რის საპასუხოდაც მარგველაშვილმა აღნიშნა, რომ მნიშვნელოვანია პრემიერის თანამდებობიდან წასვლის მიზეზების თაობაზე არა მისი, არამედ საზოგადოების ინფორმირება.

„მე ამას არ განვიხილავ კერძო ჭრილში. ჩემი ცოდნა არ არის მნიშვნელოვანი. მნიშვნელოვანია საზოგადოებამ იცოდეს, რა პრინციპით გვყავს ან აღარ გვყავს უმაღლესი თანამდებობის პირები“, - აღნიშნა პრეზიდენტმა.