კომენტარი

ჩემსა და გუბაზ სანიკიძეს შორის მოლაპარაკება „ფორუმის“ „ოცნებაში“ ყოფნის დროს არ მიმდინარეობდა - ნინო ბურჯანაძე

„დემოკრატიული მოძრაობის“ ლიდერის, ნინო ბურჯანაძის განცხადებით, გუბაზ სანიკიძესთამ პოლიტიკური მოლაპარაკებები, „ეროვნული ფორუმის“ „ქართულ ოცნებაში“ ყოფნის პერიოდში არ მიმდინარეობდა.

როგორც ბურჯანაძემ „ტვ პირველის“ ეთერში განმარტა, იგი გუბაზ სანიკიძეს და მის ოჯახს მრავალი წლის განმავლობაში იცნობს, თუმცა ეს ნაცნობობა პოლიტიკურად აქტიურ ხასიათს ხშირად არ ატარებდა.

„იმ დროს, როდესაც „ფორუმი“ „ოცნებაში“ იყო, არანაირი კულუარული მოლაპარაკებები არ ყოფილა. გუბაზი არ აწარმოებს კულუარულ და ზურგს უკან მოლაპარაკებებს, ისევე როგორც მე. ეს მოლაპარაკებები დაიწყო სულ მოკლე პერიოდის განმავლობაში, განსაკუთრებით წინასაარჩევნო პერიოდის გააქტიურების შემდეგ. მაშინ ჩვენ გვინდოდა ერთიანი ოპოზიციური სპექტრი შექმნილიყო, თუმცა ეს არ მოხერხდა და ნამდვილად ეს კარგი არ იყო. მაგრამ განსაკუთრებით ეს კონსულტაციები გააქტიურდა არჩევნების შემდეგ. იმიტომ, რომ გუბაზ სანიკიძეს ისევე როგორც მე მიმაჩნია, რომ ახლა გაჩუმების დრო არ არის, პასიურ ოპოზიციაში ყოფნის დრო არ არის და ძალიან მნიშვნელოვანია, რომ ოპოზიციურმა პოლიტიკურმა ძალამ, როგორიც არის ჩვენი, უნდა გაძლიერდეს“,-აღნიშნა ბურჯანაძემ.

მისი თქმით, ისეთი გამოცდილი პოლიტიკოსის შემოერთება, როგორიც არის გუბაზ სანიკიძე, ძალიან პოზიტიური იქნება მისი პარტიისთვის და გუნდისთვის.

დღეს, გამართულ ბრიფინგზე გახდა ცნობილი, რომ ცოტა ხნის წინ „ეროვნული ფორუმიდან“ წასული გუბაზ სანიკიძე, „დემოკრატიული მოძრაობის“ ერთ-ერთი ლიდერი გახდა.

მონიკა დავლიანიძე