კომენტარი

ჩემს კარიერაში პოლიტიკური შემადგენლობა მინიმალურია - ზაზა თავაძე

საკონსტიტუციო სასამართლოს თავმჯდომარის, ზაზა თავაძის განცხადებით, ის სერიოზულად ვერ აღიქვამს ბრალდებას იმის შესახებ, რომ საკონსტიტუციო სასამართლოში ბიძინა ივანიშვილის სურვილის გამტარებელი იქნება.

ამის შესახებ თავაძემ, სააგენტო Sova News-თვის მიცემულ ინტერვიუში განაცხადა.

თავაძეს არასწორად მიაჩნია თანამდებობის პირების დაყოფა „ჩემიანებად“ და „ სხვისიანებად“.

მისივე თქმით, მას ისეთ ადამიანად ახასიათებენ, რომელსაც შეუძლია შეასრულოს მასზე დაკისრებული მოვალეობა. ამიტომ, სთავაზობს ოპონენტებს მისი შეფასება მის მიერ გაკეთებული საქმეებითა და მიღებული გადაწყვეტილებებით მოხდეს.

„მოდით, ყველაფერს თავისი სახელი დავარქვათ. მე პოლიტიკოსი არ ვარ, და არასდროს ვყოფილვარ. ამიტომ საუბარი იმაზე, რომ ამა თუ იმ პოლიტიკურ პარტიასთან დაახლოებულ პირი ვარ - აპრიორი არასწორია. ჩემს კარიერაში პოლიტიკური შემადგენლობა მინიმალურია“,-აღნიშნა თავაძემ.
ე.წ გახმაურებულ საქმეებზე საუბრისას სასამართლოს თავმჯდომარე აღნიშნავს, რომ ყველაფერი ბანალურად მარტივია.

მისი თქმით, არსებობს ვადები რომლებიც კანონით არის განსაზღვრული. ისეთი შთაბეჭდილება იქმნება, რომ ის რაც საკონსტიტუციო სასამართლოს ირგვლივ ხვდება, რუსთავი2-თან დაკავშირებული ხმაური - პრევენციული ზომებია.

„ვფიქრობ, რომ საკონსტიტუციო სასამართლოს იმიჯის შელახვა ვითარებას მხოლოდ დაამძიმებს: შეუქმნის ნეგატიურ ფონს იმ გადაწყვეტილებას, რომელსაც საქმესთან დაკავშირებით საკონსტიტუციო სასამართლო გამოიტანს“,-აღნიშნა თავაძემ.

ე.წ კაბელებისა და გიგი უგულავას საქმეზე საუბრისას კი ზაზა თავაძე ამბობს, რომ ეს სუბიექტურად ანგაჟირებული საკითხებია.

საკონსტიტუციო სასამართლოს ახლად არჩეული თავმჯდომარე მართლმსაჯულების არჩევითობაზე საუბრობს, და აღნიშნავს, რომ ეს მისთვის კატეგორიულად მიუღებელია.

„რით არის სხვა საქმეები ამ ორ საქმეზე ნაკლებად მნიშვნელოვანი?! როგორ მოვიქცეთ ის საქმეებთან მიმართებაში, რომლებიც სასამართლოში კაბელების საქმისა და უგულავას საქმეზე ადრე შემოვიდა. თაროზე შემოვდოთ, შემდეგისთვის გადავდოთ? ამიტომ, ჩვენ კანონის შესაბამისად ვიმოქმედებთ“,-განმარტა ზაზა თავაძემ.

მონიკა დავლიანიძე