მსოფლიო

ჩემი პასპორტი პეტრო პოროშენკოს კაბინეტშია - მიხეილ სააკაშვილი

საქართველოს ყოფილი პრეზიდენტისა და ოდესის ყოფილი გუბერნატორის, მიხეილ სააკაშვილის მტკიცებით, მისი პასპორტი უკრაინის პრეზიდენტის, პეტრო პოროშენკოს კაბინეტში ინახება. ამის შესახებ მან ლვოვში, სასტუმრო ლეოპოლისის წინ გამართულ ბრიფინგზე განაცხადა.

„ძალიან ინფორმირებული წყაროების ცნობით, ჩემი პასპორტი, რომელიც მომპარეს, ახლა დევს უკრაინის პრეზიდენტის, პეტრო ალექსეის ძე პოროშენკოს კაბინეტში“, - განაცხადა სააკაშვილმა.

მან აღნიშნა, რომ პასპორტი პოროშენკოს ორშაბათ დილას დაახვედრეს.

„პასპორტი დილას მიუტანეს, როცა ის სამსახურში მივიდა, ჩვენი დაბრუნებიდან მომდევნო დღეს“, -აღნიშნა ოდესის ყოფილმა გუბერნატორმა.

შეგახსენებთ, გუშინ სააკაშვილმა ჟურნალისტებს აცნობა, რომ საზღვრის გადაკვეთის დროს მას პასპორტი ავტობუსში დარჩა. მისივე მტკიცებით, უკრაინელი სამართალდამცავები ავიდნენ ავტობუსში და მისი პასპორტი მოიპარეს.

10 სექტემბერს 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი „შეგინი“გადაკვეთა. ის ახლა ლვოვში იმყოფება.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი „სისხლის სამართლის კოდექსის“ 348-ე მუხლის დანაშაულის ნიშნებსაც შეიცავს.

ანა მებურიშვილი