კომენტარი

ჩატარებული არჩევნები არ იძლევა იმის საფუძველს, რომ ჩვენ არ ვაღიაროთ - მანანა ნაჭყებია

„ახალი მემარჯვენეების“ ერთ-ერთი ლიდერის, მანანა ნაჭყებიას განცხადებით, საარჩევნო სისტემის შეცვლის საკითხის განსახილველად ისეთი პოლიტიკური პარტიები შეიკრიბება, რომლებსაც ერთნაირი იდეოლოგია გააჩნია.

როგორც ნაჭყებიამ პრესკონფერენციაზე აღნიშნა, ესენი ვერ იქნებიან „ქართული ოცნება“ და ნაციონალური მოძრაობა.

„საარჩევნო სისტემა რომ შესაცვლელია, ეს ყველამ იცის. ამ ეტაპზე არის იმის შანსი, რომ ხელისუფლება წამოვიდეს სისტემის შეცვლის განხილვის მოლაპარაკებაზე. ჩვენ, ისეთი ოპოზიციური ძალები შევიკრიბებით, ვისაც ერთნაირი იდეოლოგია გაგვაჩნია. ესენი არ იქნებიან „ქართული ოცნება“ და ნაციონალური მოძრაობა.

ზოგი პარტია აპირებს, რომ განცხადება გააკეთოს არჩევნებზე და აღნიშნოს, რომ არ აღიარებს არჩევნების შედეგებს, თუმცა ჩვენ ამას არ ვიზიარებთ, რადგან ჯერ ერთი, ეს არაფერს მოგვცემს და მეორეც, ყველა საერთაშორისო ორგანიზაციამ აღიარა არჩევნების შედეგები. ამიტომ, ჩატარებული არჩევნები არ იძლევა იმის საფუძველს, რომ ჩვენ არ ვაღიაროთ“,-განაცხადა მანანა ნაჭყებიამ.

მონიკა დავლიანიძე