კომენტარი

ჩამონათვალში მოხვედრა არ ნიშნავს იმას, რომ კონსულტაციებს გავაგრძელებ ჩემს პრეზიდენტობაზე - დავით სერგეენკო

მე რომ ჩამონათვალში მოვხვდი, ეს არავითარ შემთხვევაში არ ნიშნავს, რომ ამ შეხვედრიდან გავალ და კონსულტაციებს გავაგრძელებ ჩემს პრეზიდენტობაზე, - განაცხადა ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა დავით სერგეენკომ საპრეზიდენტო კანდიდატებთან დაკავშირებით პარტია „ქართული ოცნების“ თავმჯდომარის, ბიძინა ივანიშვილის განცხადების კომენტირებისას.

„განიხილება ერთ შემთხვევაში ის, რომ „ქართულმა ოცნებამ“ საერთოდ არ წარადგინოს პარტიული საპრეზიდენტო კანდიდატი, რაც, ჩემი აზრითაც, უფრო მაღალი ხარისხის დემოკრატია იქნება. მე ერთ-ერთ ჩამონათვალში მოვხვდი და ეს არავითარ შემთხვევაში არ ნიშნავს, რომ ამ შეხვედრიდან გავალ და კონსულტაციებს გავაგრძელებ ჩემს პრეზიდენტობაზე. რა თქმა უნდა, ეს ასე არ არის“, - განაცხადა სერგეენკომ.

ცნობისთვის, ბიძინა ივანიშვილის თქმით, „ქართულ ოცნებაში“ ბევრი ღირსეული კანდიდატია, თუმცა მისი პოზიციაა, რომ გუნდიდან არ დაასახელონ საპრეზიდენტო კანდიდატი.

„მართლაც რამდენიმე კანდიდატზეა საუბარი. იქ ზურაბ აბაშიძე, სოზარ სუბარი, სერგეენკო, ჩემზეც ამბობენ, თეა წულუკიანი და ბევრი ღირსეული კანდიდატი გვყავს ჩვენ, ვინც მართლა შეიძლება პირველსავე ტურში მოახერხოს და გაიმარჯვოს. ჩემი პოზიციაა, რომ გუნდიდან არ დავასახელოთ კანდიდატი“, - განაცხადა ივანიშვილმა.