კომენტარი

ბუნებრივია, შემცირება იქნება - ლევან დავითაშვილი

გარემოს დაცვისა და სოფლის მეურნეობის მინისტრის, ლევან დავითაშვილის ინფორმაციით, უწყებაში მიმდინარე სტრუქტურულ ცვლილებებს მოჰყვება შემცირებები.

„ესაა პროცესი, რომელსაც ჩვენ ვიწყებთ, და ამას დასჭირდება გარკვეული დრო, თუმცა ამ ცვლილებებს იურიდიული საფუძველი სჭირდება და ვიდრე საკანონმდებლო ცვლილებები დასრულდება, ჩვენ, ალბათ, ოპტიმიზაციის გეგმით მზად ვიქნებით, რომ საზოგადოების წინაშე წარვდგეთ.

ბუნებრივია, შემცირება იქნება. ამოცანაც ეს არის, რომ მოხდეს ეკონომია, ეფექტიანი მართვა“, -თქვა მინისტრმა.

დავითაშვილმა აღნიშნა, რომ შენარჩუნდება ის სსიპ-ები და აიპ-ები, რომლებიც საჭიროა გარემოსდაცვითი და სოფლის მეორნეობის პოლიტიკის შესასრულებლად.

შეგახსენებთ, გუშინ საქართველოს პრემიერ-მინისტრ გიორგი კვირიკაშვილის ბრძანებით, გარემოსა და ბუნებრივი რესურსების სამინისტროს გამოეყო ბუნებრივი რესურსების ნაწილი, რომელიც ეკონომიკის სამინისტროს გადაეცა, ხოლო მას დაემატა სოფლის მეურნეობის სამინისტრო. აღნიშნული უწყების ხელმძღვანელად კი ლევან დავითაშვილი დანიშნეს.

ანა მებურიშვილი