მსოფლიო

ბრიტანეთში ტერაქტების საშიშროებამ იმატა - MI 5-ის ხელმძღვანელი

ბრიტანეთის კონტრდაზვერვის MI 5-ის ხელმძღვანელის ენდრიუ პარკერის განცხადებით, „ბრიტანეთის სპეცსამსახურებს ტერორიზმთან ბრძოლა უფრო აქტიურად უწევთ“.

როგორც პარკერმა ლონდონში გამართულ ბრიფინგზე აღნიშნა, ტერორიზმის საშიშროების გამოვლინება რთულდება და მის უწყებას უფრო ხშირად უწევს ამ პრობლემასთან გამკლავება.

პარკერის თქმით, მი5 ამჟამად 500 ოპერაციას ამუშავებს, რომლებიც ექსტრემისტულ საქმიანობაში ჩართულ დაახლოებით 3 ათას ადამიანს შეეხება.

მი5-ის ხელმძღვანელმა განმარტა, რომ პოტენციურ საშიშროებას წარმოადგენენ ის პირები, რომლებიც არიან, ან იყვნენ უწყებისთვის ცნობილი და ერაყსა და სირიაში ბრძოლებში მონაწილეობის მისაღებად წავიდნენ. მისი თქმით, ასეთია 800 ადამიანი.

მანვე აღნიშნა, რომ საერთაშორისო საზოგადოება მნიშვნელოვან როლს ასრულებს ერთობლივ ბრძოლაში. პარკერმა ხაზგასმით აღნიშნა ჰოლანდიაში არსებული კონტრტერორისტული ცენტრის საქმიანობის მნიშვნელობა, სადაც სხვადასხვა ქვეყნების დაზვერვის ინფორმაცია გროვდება და მუშავდება.

პარკერის განცხადებით, აღნიშნული ცენტრის მუშაობის შედეგად ევროპაში 12 ადამიანის დაკავება მოხერხდა.

მონიკა დავლიანიძე