მსოფლიო

ბრიტანეთის შინაგან საქმეთა მინისტრმა მიგრანტთა დეპორტაციასთან დაკავშირებული სკანდალის გამო თანამდებობა დატოვა

დიდი ბრიტანეთის საგარეო საქმეთა მინისტრმა ემბერ რუდმა მიგრანტების გაძევებასთან დაკავშირებით აგორებული სკანდალის გამო თანამდებობა დატოვა. შესაბამისი წერილით რუდმა ქვეყნის პრემიერ ტერეზა მეის მიმართა.

„მე ჩავთვალე აუცილებლად ამის გაკეთება [გადავმდგარიყავი], რადგან არამიზანმიმართულად შეცდომაში შევიყვანე შინაგან საქმეთა საპარლამენტო კომიტეტი არალეგალ იმიგრანტთა გაძევების მიზნობრივ მაჩვენებლებთან დაკავშირებით. უნდა ვყოფილიყავი სიტუაციის კურსში და ამაზე სრულ პასუხისმგებლობას ვიღებ“, -წერია რუდის წერილში.

მეიმ რუდის მოთხოვნა გადადგომის შესახებ დააკმაყოფილა.

სკანდალი აგორდა ბრიტანეთში ე.წ. უინდრაშის თაობის მიგრანტთა გარშემო, რომლებიც ბრიტანეთში ნახევარ საუკუნეზე მეტია ცხოვრობენ. ისინი 1948 წლის 22 ივნისს კარიბის ზღვის აუზიდან ჩავიდნენ ლონდონში გემზე სახელწოდებით - „ემპაია უინდრაშ“. აღნიშნული მიგრანტები მიიწვიეს ქვეყანაში სამუშაო ძალის დეფიციტის აღმოფხვრის მიზნით.

ვნებათაღელვა გამოიწვია შინაგან საქმეთა სამინისტროში არსებულმა დოკუმენტებმა, რომელთა მიხედვით 1940-იანებიდან 1970-იან წლებამდე ჩამოსული „უინდრაშები“ და მათი ნათესავები არალეგალ მიგრანტებად შერაცხეს.

ემბერ რუდს იმის გამო აკრიტიკებდნენ, რომ მისმა დამხმარეებმა შეადგინეს უინდრაშის თაობის მიგრანტთა დეპორტაციის მიზნობრივი მაჩვენებლები, რის შესახებ რუდი ინფორმირებული იყო.

კვირას გაზეთმა „გარდიანმა“ გამოაქვეყნა ემბერ რუდის მიერ ტერეზა მეისადმი წინა წელს გაგზავნილი წერილის ასლი, რომელშიც შინაგან საქმეთა მინისტრი მიზნად ისახავს, უახლოეს რამდენიმე წელიწადში გააძევოს არალეგალთა კიდევ 10%.