კომენტარი

ბიუჯეტში გათვალისწინებულია საცობების განტვირთვისთვის პარკინგების მოსაწყობად 10 ადგილი - გულიკო ზუმბაძე

თბილისის საკრებულოს ადამიანის უფლებათა დაცვის კომისიის თავმჯდომარის, გულიკო ზუმბაძის განცხადებით, დედაქალაქის ბიუჯეტი შემცირებულია 47 მილიონი ლარით, თუმცა ეს შემცირება ადმინისტრაციულ ხარჯის შედეგად ხდება.

როგორც ზუმბაძემ პრესკონფერენციაზე აღნიშნა, ამ ეტაპზე არც სტიქიის დროს გამოყოფილი ტრანსფერია საჭირო.

„დედაქალაქის ბიუჯეტი შემცირებულია 47 მილიონი ლარით, თუმცა ეს ეხება ადმინისტრაციული რესურსის ხარჯის შემცირებას, ასევე სტიქიის დროს იყო გამოყოფილი ტრანსფერი და თავისთავად არც ეს აღარაა ამ ეტაპზე საჭირო.“,-აღნიშნა ზუმბაძემ.

მისი თქმით, ძალიან მნიშვნელოვანია, რომ ბიუჯეტის ძირითადი თანხები სატრანსპორტო საშუალებების ინფრასტუქტურის გაუმჯობესებას მოხმარდება.

„ასევე გათვალისწინებულია საცობების განტვირთვის მიზნით პარკინგების მოწყობა, ამისთვის მერიამ 10 ადგილი შეარჩია, თუმცა, პირადად მე მაქვს ინიციატივა. არიან კერძო მესაკუთრეები, ვისაც აქვთ მიწის ნაკვეთები და შესაძლებელია, რომ შეთანხმების საფუძველზე გაკეთდეს კერძო პარკინგები. ამ შეთხვევაში მერია მიწას გასცემს იჯარით, რაც ნაკლებად სახარბიელოა“, – განაცხადა გულიკო ზუმბაძემ.

მისი თქმით, კომისიის წევრები ბიუჯეტის განხილვის დაწყებამდე სხვადასხვა სფეროს წარმომადგენლებს შეხვდნენ და ყურადღება, ბინათმშენებლობის შედეგად დაზარალებული ადამიანების და შშმ პირების პრობლემებზე გამაახვილეს.

„ჩვენს ქვეყანაში არის საბინაო პრობლემა. ის თავშესაფრები ვერ უზრუნველყოფს ამ ადამიანებისთვის პირობების შექმნას, ამიტომ ჩვენი ძირითადი შენიშვნა იქნება იმ პოზიციის ჩამოყალიბება თუ რა კრიტერიუმებით დავიცვათ ბინათმშენებლობის კუთხით დაზარალებული მოსახლეობა“, – განაცხადა გულიკო ზუმბაძემ.

მონიკა დავლიანიძე