კომენტარი

ბიძინა ივანიშვილის ლოზუნგი იყო დავამთავროთ ერთპარტიულობა, წრეზე ვიარეთ და ისევ იქ მოვედით - დავით უსუფაშვილი

საქართველოს მერვე მოწვევის პარლამენტის თავმჯდომარის, დავით უსუფაშვილის, განცხადებით, „ქართულმა ოცნებამ“ ვერ გადადგა ის აუცილებელი ნაბიჯები დემოკრატიული განვითარებისკენ, რაც 2012 წელს და მის შემდგომ ჰქონდა დაგეგმილი.

ამის შესახებ უსუფაშვილმა შემაჯამებელ ბრიფინგზე განაცხადა.

„სამწუხაროდ, ჩვენ ვერ გადავდგით ის აუცილებელი ნაბიჯები ქვეყნის დემოკრატიული განვითარებისკენ, სახელმწიფოს ფუნდამენტის გამყარებისკენ, რაც დაგეგმილი იყო 2012 წელს და 2012 წლის შემდგომ კოალიცია „ქართული ოცნების“ მიერ. ჩვენ ვერ მივიღეთ უფრო მრავალპარტიული და უფრო ეფექტური პარლამენტი. მაგრამ მივიღეთ პარლამენტი, რომელსაც აქვს საშუალება იყოს ძალიან პროდუქტიული და ეფექტურიც, მაგრამ აქვს, სამწუხაროდ,ხიფათიც, რომ იყოს მეტი შეცდომის დამშვებიც, იმ კომპოზიციიდან გამომდინარე რაც პარლამენტში შეიქმნა“,-განაცხადა უსუაფშვილმა.

მისი თქმით, ბიძინა ივანიშვილის პარტნიორიბა და მასთან 4-5 წლის მოღვაწეობა ამ თემასთან მიმართებაში ივანიშვილი შეხედულებებმა გადააწყვეტინა.

„მისი ლოზუნგი იყო „დავასრულოთ ერთპარტიულობა“, „უნდა დავამყაროთ მრავალპარტიულობა“. მან პირველი ნაბიჯები სწორედ ასე გადადგა- ერთი პარტია, მეორე პარტია, ვისთანაც მე სტრატეგიულად ვითანამშრომლებ, მე თვითონ შევქმნი პარტიას რომელიც ერთმნიშვნლოვნად იქნება ერთ-ერთი მოთამაშე პოლიტიკურ სივრცეში. მაგრამ, ვიარეთ წრეზე და მოვედით ისევ იქ, რომ თურმე ერთპარტიულობის შეცვლა ვიღაცებისთვის ნიშნავდა ცუდი ერთპარტიულობის შეცვლას კარგი ერთპარტიულობით. ანუ ვართ ისევ კარგი მეფის ძიებაში“,-აღნიშნა პარლამენტის თავმჯდომარემ.

მონიკა დავლიანიძე