მსოფლიო

ბელარუსი სირიაზე განხორციელებულ იერიშს გმობს

ბელარუსის მთავრობა კოალიციური ძალების მიერ სირიაში განხორციელებულ იერიშს გმობს. ამის შესახებ განცხადებას ბელარუსის საგარეო საქმეთა უწყება ავრცელებს.

მინსკის თქმით, სირიაში შექმნილი სიტუაცია შეიძლება საერთაშორისო მასშტაბის კონფლიქტში გადაიზარდოს.

„შესაბამისად სიტუაცია სირიაში ფაქტობრივად გადაიზრდება საერთაშორისო სამხედრო კონფლიქტში, რომელიც არაკონტროლირებადი ესკალაციის საფრთხეს ქმნის, რომელიც ცდება რეგიონს“, - წერია განცხადებაში.

ბელარუსი მოუწოდებს მხარეებს, შეწყვიტონ სამხედრო ძალის გამოყენება სხვა ქვეყნების წინააღმდეგ და მოლაპარაკებათა მაგიდაზე იმსჯელონ კონფლიქტის მოგვარების მშვიდობიან გზებზე.

მინსკმა ასევე დაგმო ქიმიური იარაღის გამოყენება და აღნიშნა, რომ ამაზე პასუხისმგებელი პირები უნდა დაისაჯნონ.

„თუმცა საპასუხო ნაბიჯები უნდა იყოს დაფუძნებული ერთმნიშვნელოვან და შემოწმებულ ფაქტებზე და უნდა განხორციელდეს საერთაშორისო სამართლის ნორმების შესაბამისად. აქედან არცერთი კრიტერიუმი არ იყო დაცული იმათ მიერ, ვინც სირიაზე განახორციელა იერიში“, - წერია განცხადებაში.

აშშ-ის პრეზიდენტმა დონალდ ტრამპმა სირიაზე იერიშის მიტანის ბრძანება გასცა. დღეს გამთენიისას კოალიციურმა ძალებმა, რომლებშიც შედიან აშშ, დიდი ბრიტანეთი და საფრანგეთი, სირიაში სამიზნეებზე ავიადარტყმები განახორციელეს. მათი განმარტებით, ესაა პასუხი 7 აპრილს, ქალაქ დუმაზე განხორციელებულ იერიშზე, სადაც სავარაუდოდ ქიმიური იარაღი გამოიყენეს. დასავლეთი მომხდარში სირიის მთავრობას ადანაშაულებს, თუმცა ბაშარ ალ-ასადის რეჟიმი რამე მონაწილეობას უარყოფს.