კომენტარი

ბატონი ბიძინა დავიცავი, როდესაც ვთქვი, რომ მეჭიაურს პარტიაში ზაქარიამ გაუწია რეკომენდაცია - ზაქარია ქუცნაშვილი

საპარლამენტო უმრავლესობის წევრის, თიანეთის მაჟორიტარი დეპუტატის ზაქარია ქუცნაშვილის თქმით, მან ყოფილი პრემიერი ბიძინა ივანიშვილი დაიცვა, როდესაც თქვა, რომ თამაზ მეჭიაურს რეკომენდაცია თავად გაუწია.

ამის შესახებ ქუცნაშვილმა „იმედის კვირას“ განუცხადა.

მისი თქმით, მთელი წინასაარჩევნო კამპანიის დროს თამაზ მეჭიაური ლაძღვა-გინებით იყო დაკავებული, თავად კი მაღალი კულტურის პრინციპს იცავდა და საპასუხო განცხადება, მხოლოდ არჩევნების დასრულების შემდეგ გააკეთა.

„მთელი წინასაარჩევნო კამპანია ადამიანმა ლანძღვა-გინებით ატარა. დილას იღვიძებდა და „ფეისბუკზე“ დებდა არა კრიტიკის, არამედ ლანძღვა - გინების პოსტებს. ჩემები, იგივე პარტიაში, იგივე პარლამენტში მეგობრები მთხოვდნენ, „ზაქრო მოითმინე, ზაქრო გატარე, ზაქრო აპატიე“. მე ვეუბნებოდი მათ, „ეს იმოქმედებს ამომრჩევლის დაბნევაზე. მთაში, როცა გაგინებენ და შენ პასუხს ვერ ცემ, ვერც კაცურად, ვერც სატელევიზიო ინტერვიუსას- ეს იმოქმედებს“. და მაინც მეუბნებოდნენ „არა, მოითმინე. არასერიოზული კაცია, მაგას ლოთის იმიჯი აქვსო და მაგის სიტყვებს რა აზრი აქვსო“. მე ვამბობდი „ეს დამაზიანებს“. მეუბნებოდნენ „აჩვენე მაღალი კულტურა“. ვაჩვენე მაღალი კულტურა. ეს მოხდა მაშინ, როდესაც დამთავრდა არჩევნები, დამთავრდა სასამართლო, მიცვალებული დასაფლავებული გვყავს და ჟურნალისტები მეკითხებიან, რატომ არ სცემთ პასუხსო. კაცი გლანძღავს, ვიღაცა ხომ დაიჯერებს.

მართლაც 5 ათასი ხმა მივიღე შარშან თაინეთში, ახლა ჩვენმა კანდიდატმა კი 3 ათასი ხმა მიიღო. ამ ტყუილებმა და ამ შეურაცხყოფებმა, როგორც ჩანს, ვიღაცეებზე იმუშავა.

ბევრმა მითხრა, გულწრფელი საუბრით სამზარეულოს თემები ხომ არ გამოიტანე გარეთო. პირიქით, მგონია, რომ ის ტყუილი, რასაც მეჭიაური ტირაჟირებდა, რომ პარტიასა და პარლამენტში ბიძინა ივანიშვილმა მიიყვანა, მე ბატონი ბიძინა დავიცავი, როდესაც ვთქვი, რომ მას პარტიაში ზაქარიამ გაუწია რეკომენდაცია, ხოლო პარლამენტში მოხვდა შანტაჟის გზით”, - განაცხადა ქუცნაშვილმა.

მონიკა დავლიანიძე