მსოფლიო

ბარაქ ობამამ რუსეთის წინააღმდეგ სანქციები ერთი წლით გაახანგრძლივა

ამერიკის 44-ე პრეზიდენტის ბარაქ ობამას ადმინისტრაციამ, უფლებამოსილების შეჩერებამდე რამდენიმე დღით ადრე, რუსეთის წინააღმდეგ სანქციები კიდევ ერთი წლით გაახანგრძლივა.

ამის შესახებ თეთრი სახლის ცნობაშია ნათქვამი.

„ვახანგრძლივებ ერთი წლით ექსტრემალური ზომების რეჟიმს“,-ნათქვამია განცხადებაში, რომელსაც ხელს ბარაქ ობამა აწერს.

დოკუმენტის ტექსტში დაზუსტებისთვის აღნიშნულია, რომ ყოველივე ეს უკავკშირდება რუსეთის მიერ ყირიმის ანექსიასა და უკრაინის აღმოსავლეთში სამხედრო კონფლიქტის წარმოებას.

გარდა ამისა, ობამამ სანქციები ირანის, კუბას, ლიბიის, ზიმბაბვესა და ვენესუელას წინააღმდეგ გაახანგრძლივა.

შეგახსენებთ, რომ რუსეთის წინააღმდეგ პირველი სანქციები 2014 წლის მარტში იქნა შემოღებული, იმ პირების წინააღმდეგ, რომლებიც ამერიკის აზრით, ყირიმის ანექსიასთან არიან კავშირში. სიაში მოხვედრილ პირებს ამერიკაში შესვლა აეკრძალა, ასევე მათი აქტივები იქნა გაყინული.

ამის შემდეგ ამერიკას არაერთხელ გაუფართოებია სანქციათა სია, და მასში არამარტო ცალკეული პირები, არამედ რუსეთის ეკონომიკის დარგებიც მოხვდა.

2016 წლის დეკემბერში, ამერიკის ფინანსთა უწყებამ სანქციათა სია კიდევ ერთხელ გააფართოვა.

გარდა ამისა, ვაშინგტონმა ქვეყნიდან 35 რუსი დიპლომატი გააძევა, რაც, მათი თქმით, იმ ჰაკერულ თავდასხმებს უკავშირდება, რომელიც ამერიკის საპრეზიდენტო კამპანიის დროს დემოკრატიული პარტიის შტაბის სერვერებზე იქნა მიტანილი.

მონიკა დავლიანიძე