მსოფლიო

ბარაქ ობამა ამერიკელებს გამოსამშვიდობებელი სიტყვით ჩიკაგოდან მიმართავს

ამერიკის 44-ე პრეზიდენტი, ბარაქ ობამა, ამერიკელებს გამოსამშვიდობებელი სიტყვით დღეს, ჩიკაგოდან მიმართავს.

ობამას თქმით, მან ჩიკაგოზე არჩევანი იმიტომ შეაჩერა, რომ ის იყო ქალაქი, საიდანაც მან თავისი პოლიტიკური კარიერა დაიწყო.

ღონისძიებასთან დაკავშირებულ ვიდეომიმართვაში ბარაქ ობამამ დაანონსა, რომ სიტყვაში იგი გაიხსენებს იმ წლებს, როდესაც სკოლის დასრულების შემდეგ, საორგანიზაციო სამუშაოებით იყო დაკავებული.

მისი თქმით, მას ამერიკის დემოკრატიის შესაძლებლობების რწმენა ამოძრავებდა.

ბარაქ ობამა აღნიშნავს, რომ პრეზიდენტად მუშაობის რვა წლის განმავლობაში, მან ორი გაკვეთილი დაიმახსოვრა: რომ ამერიკელები ბუნებით კეთილები არიან და რომ ცვლილებები შესაძლებელია.

ბარაქ ობამა გამოსამშვიდობებელ სიტყვას ჩიკაგოს McCormick Place კონგრეს-ცენტრში წარმოთქვამს, რომელსაც ათასობით ადამიანი დაესწრება.

ამერიკის 45-ე პრეზიდენტის, დონალდ ტრამპის ინაუგურაციის ცერემონია, 20 იანვარს გაიმართება.

მონიკა დავლიანიძე