მსოფლიო

აზერბაიჯანის პროკურატურა, აფგან მუხტარლისთან დაკავშირებით განცხადებას ავრცელებს

აზერბაიჯანის გენერალური პროკურატურა, ჟურნალისტ აფგან მუხტარლის დაკავებასთან დაკავშირებით განცხადებას ავრცელებს, რომელსაც აზერბაიჯანული მედია აქვეყნებს.

უწყების განცხადებაში ნათქვამია, რომ „აფგან მუხტარლი საბირ ოღლუ (1974 წლის დაბადებული) სახელმწიფო სასაზღვარო სამსახურის თანამშრომლების მიერ, 29 მაისს 22:40 წუთზე, ბალაკენსის რაიონის ტერიტორიაზე იქნა დაკავებული. ის პირადობის დამადასტურებელი საბუთის გარეშე საქართველოს მხრიდან აზერბაიჯანის საზღვრის გადაკვეთას ცდილობდა, მან ასევე სასაზღვარო სამსახურის წარმომადგენლების მოთხოვნას არ დაემორჩილა და გაქცევა სცადა.

ჩხრეკისას აფგან მუხტარლის 10 ათასი ევროს ოდენობის თანხმა, ასევე Bank of Georgia ekspress-ის საბანკო ბარათი აღმოაჩნდა.

2017 წლის 30 მაისს ფაქტთან დაკავშირებით აფგან მუხტარლის ბრალი აზერბაიჯანის რესპუბლიკის 318 მუხლით(საზღვრის უკანონო გადაკვეთა), ასევე 206 მუხლით (კონტრაბანდა)წარედგინა.

2017 წლის 31 მაისს კი, მუხტარლის ბრალი 318 მუხლით (საზღვრის უკანონო გადაკვეთა), 206 (კონტრაბანდა) და 315.2 მუხლით (ხელისუფლების წარმომადგენლისთვის წინააღმდეგობის გაწევა, ან ძალის გამოყენება) წარედგინა.

საბაილის რაიონული სასამართლოს გადაწყვეტილებით, მუხტარლის აღკვეთის ღონისძიების სახით პატიმრობა მიესაჯა.

საქმეზე საგამოძიებო მოქმედებები გრძელდება“,-ნათქვამია უწყების განცხადებაში.

მონიკა დავლიანიძე