მსოფლიო

ავსტრიის ხელისუფლება ქვეყანაში 7 მეჩეთის დახურვასა და 40 იმამის გაძევებას აპირებს

ავსტრიის ხელისუფლება აპირებს, დახუროს 7 მეჩეთი და ქვეყნიდან გააძევოს 40 იმამი ისლამისტურ იდეოლოგიასთან და უცხოეთიდან, ძირითადად თურქეთიდან, დაფინანსებულ რელიგიურ გაერთიანებებთან საბრძოლველად.

ქვეყნის კანცლერის, სებასტიან კურცის განმარტებით, ავსტრიაში „არ უნდა ჰქონდეს ადგილი პოლიტიკური ისლამის პარალელურ საზოგადოებებსა და რადიკალიზაციის ტენდენციებს“.

ავსტრიის 8.8 მილიონიან მოსახლეობაში დაახლოებით 600 000 მუსლიმი ცხოვრობს, აქედან უმრავლესობას თურქები წარმოადგენენ.

„ეს მხოლოდ დასაწყისია“, - განაცხადა ვიცე-კანცლერმა ჰაინც-ქრისტიან შტრაჰემ.

გარდა ამისა, ავსტრიელმა მინისტრებმა განაცხადეს, რომ 60-მდე იმამი, რომლებიც მიეკუთვნებიან ATIB-ს (თურქეთის ხელისუფლებასთან დაახლოებულ მუსლიმურ გაერთიანებას), შეიძლება გააძევონ ქვეყნიდან ან ჩამოართვან ვიზა, რათა მათ ვეღარ მიიღონ უცხოეთის ქვეყნებიდან დაფინანსება.

თურქეთის პრეზიდენტის პრესსპიკერის, იბრაჰიმ კალინის შეფასებით, ეს გადაწყვეტილება არის ავსტრიაში „ისლამოფობიური, რასისტული და დისკრიმინაციული ტალღის“ შედეგი. მისი თქმით, ესაა მცდელობა, პოლიტიკური მიზნებისთვის შეეხონ მუსლიმებს.