კომენტარი

აუცილებლად უნდა დაისაჯოს ქრთამის გამცემიც და ქრთამის ამღებიც - ირმა ნადირაშვილი

პარლამენტის თავმჯდომარის მოადგილე ირმა ნადირაშვილი აცხადებს, რომ რუსთავი 2-ის საქმის მოსამართლის, ნატა ნაზღაიძის ოჯახის მიერ სახელმწიფო ბიუჯეტიდან მილიონი ლარის მიღებასთან დაკავშირებით უნდა დადგეს როგორც ქრთამის გამცემის, ისე ქრთამის მიმღების პასუხისმგებლობის საკითხი.

,,ხელისუფლება ყველაფერს კადრულობს რუსთავი 2-ის წასაღებად, რუსთავი 2-ის დასახურად. ჩვენ ვნახეთ ივანიშვილის რეჟიმი, რომელმაც გააღარიბა ადამიანები. გუშინ კი ვნახეთ, უკიდურესი ცინიზმი, როდესაც მოსამართლეს ქრთამს უხდიან სწორედ ამ ადამიანების ჯიბეებიდან.

ვითხოვთ, რომ საქართველოს ბანკმა გააკეთოს განმარტებები, რომელი მაღალჩინოსნის ჩარევის შედეგად მოხდა ის, რომ წართმეული ნაკვეთი, ფულის გადახდის გარეშე დაუბრუნეს მფლობელს, ნაზღაიძის ძმას.
ჩვენ მოვითხოვთ, გააკეთოს განმარტება აუცილებლად ქალაქის მერმა. ჩვენ ვთვლით, რომ აუცილებლად უნდა დაისაჯოს ქრთამის გამცემიც და ქრთამის ამღებიც’’, - განაცხადა ირმა ნადირაშვილმა.

ცნობისათვის: ტელეკომპანია ”რუსთავი 2”-ის ინფორმაციით, მეორე ინსტანციის სასამართლოში ”რუსთავი 2”-ის საქმის განმხილველი კოლეგიის თავმჯდომარის, მოსამართლე ნატა ნაზღაიძის ძმას, ზვიად ნაზღაიძეს თბილისის მერიამ სახელმწიფოს კუთვნილი 1 მილიონი ლარის ქონება გადასცა.

ნინო ექვთიმიშვილი