კომენტარი

აუდიტის დასკვნა ადასტურებს, რომ თავდაცვის სფეროში გამოყოფილი სახსრების მნიშვნელოვანი ნაწილი არ ხმარდებოდა ქვეყნის თავდაცვისუნარიანობას - ირაკლი აბესაძე

"ევროპული საქართველოს" წევრის, ირაკლი აბესაძის განცხადებით, აუდიტის დასკვნა ცალსახად ადასტურებს, რომ წლების განმავლობაში თავდაცვის სფეროში გამოყოფილი საბიუჯეტო სახსრების მნიშვნელოვანი ნაწილი არ ხმარდებოდა ქვეყნის თავდაცვისუნარიანობის გაზრდას.

როგორც აბესაძემ თავდაცვისა და სასჯელაღსრულებისა სამინისტროებთან დაკავშირებით აუდიტის სამსახურის მიერ დადებული დასკვნის კომენტირებისას განაცხადა, გამოჩნდა, რომ რეალობას შეესაბამება ოპოზიციის მიერ წლების განმავლობაში გაკეთებული პოლიტიკური შეფასება, რომლის თანახმადაც, "ქართული ოცნების" პოლიტიკა თავდაცვის სფეროში მცდარი და მავნებლურია.

„მნიშვნელოვნად მიგვაჩნია, რომ იმ პრობლემებსა და მათ შორის დანაშაულებრივ საკითხებზე, რაზეც საუბარია აუდიტის დასკვნაში, ნდობის ჯგუფზე უფრო მეტად გაფართოებულ ფორმატში, თუნდაც კომიტეტის სხდომაზე დახურულ რეჟიმში, მოწვეული იქნას თავდაცვის მინისტრი და შესაბამისი მინისტრები და პასუხი გაეცეს, რამდენად გამოსწორდა ეს დარღვევები", - განაცხადა აბესაძემ.

მისივე თქმით, აუდიტის დასკვნა მათ შორის, სასჯელაღსრულებისა და პრობაციის სამინისტროს შეთხვევაშიც შეიძლება იწვევდეს კითხვის ნიშნებს და ეს ანგარიშები სამართალდამცველმა ორგანოებმა უნდა შეისწავლონ.

ნდობის ჯგუფის შეხვედრას გენერალური აუდიტორი ირაკლი მექვაბიშვილი და აუდიტის სამსახურის წარმომადგენლების ესწრებიან.