კომენტარი

ათეული წლების განმავლობაში საქართველოს ხელისუფლებებმა ვერ მოახერხეს ამ თემის ერთხელ და სამუდამოდ მოგვარება - გია ვოლსკი

პარლამენტის ვიცე-სპიკერის, გია ვოლსკის განცხადებით, სამწუხაროა, რომ 2019 წლის ბიუჯეტში პრიორიტეტად კვლავ რჩება სოციალური პრობლემები, რომლის მოგვარება ათეული წლების განმავლობაში ვერ მოხერხდა.

როგორც მან ჟურნალისტებს განუცხადა, ბიუჯეტში მნიშვნელოვანი ადგილი ეთმობა ინფრასტრუქტურულ პროექტებს, თავდაცვასა და უსაფრთხოებას.

„სამწუხარო ფაქტია, მაგრამ 2019 წლის ბიუჯეტში პრიორიტეტად კვლავ რჩება სოციალური პრობლემები, რომელიც საქართველოს ახასიათებს და ამ მხრივ დადებითად უნდა შევაფასოთ ის, რომ გაიზრდება სოციალურ პროგრამებზე გამოყოფილი თანხები.

სამწუხაროა, რომ ათეული წლების განმავლობაში საქართველოს ხელისუფლებებმა ვერ მოახერხეს ამ თემის ერთხელ და სამუდამოდ მოგვარება, გარდა ამისა, ძალიან მძიმე მემკვიდრეობაა ადამიანების ჯანმრთელობის თვალსაზრისით. ბევრი რამ უნდა გაკეთდეს იმისთვის, რომ ფიზიკურად გადარჩეს ბევრი ადამიანი. მე ვფიქრობ, რომ მნიშვნელოვანია, ყველა ხაზით განსაკუთრებული ყურადღების გამოჩენა, ეს რაც შეეხება სოციალურ თემას. მნიშვნელოვანი თანხებია გამოყოფილი ინფრასტრუქტურული პროგრამებისათვის, რაც თავისთავად ეკონომიკურ ზრდასთან იქნება დაკავშირებული. რასაკვირველია, პრიოროტეტია თავდაცვა და უსაფრთხოება,“–განაცხადა გია ვოლსკიმ.