მსოფლიო

აშშ-ს სამხედრო გეგმები ირანის წინააღმდეგ მზადაა, თუმცა ტრამპი ბრძანებას ჯერ არ იძლევა

ამერიკულმა გამოცემა The Wall Street Journal-მა ინფორმირებულ წყაროებზე დაყრდნობით გაავრცელა ინფორმაცია, რომ აშშ-ს პრეზიდენტმა დონალდ ტრამპმა უკვე დაამტკიცა ირანის წინააღმდეგ სამხედრო დარტყმის გეგმა, თუმცა ამ დროისთვის მის განხორციელებაზე საბოლოო ბრძანება ჯერ არ გაცემულა.

ტრამპი კვლავ ელის, რომ თეირანი უახლოეს მომავალში უარს იტყვის ბირთვულ პროგრამაზე.

გეგმის მიხედვით, შესაძლო თავდასხმის მთავარ ობიექტს ფორდოს ურანის გამდიდრების ქარხანა წარმოადგენდეს — ობიექტი, რომელიც მდებარეობს მთის ქვეშ და ამერიკელი სამხედრო ექსპერტების შეფასებით, მხოლოდ ყველაზე ძლიერ ბომბებს, კერძოდ GBU-57A-ს დაექვემდებარება. ამ ტიპის ბომბის ერთადერთი პლატფორმა – B-2 Spirit-ის ტიპის სტელს-ბომბდამშენი – მხოლოდ აშშ-ის შეიარაღებაშია.

Axios-ის წყაროების მიხედვით, დონალდ ტრამპს სურს, თავდასხმამდე მიიღოს სამხედროებისგან გარანტია, რომ აშშ-ს არსენალში არსებული ბომბები ნამდვილად შეძლებს აღნიშნული ობიექტის განადგურებას. ამავდროულად, პრეზიდენტი ცდილობს, თავი აარიდოს მასშტაბურ ომს და სამხედრო მოქმედებები მხოლოდ მიზანმიმართული დარტყმებით შეზღუდოს.

ამ ფონზე, სააგენტო Bloomberg იუწყება, რომ აშშ-ის მაღალჩინოსნები ემზადებიან ირანის წინააღმდეგ შესაძლო დარტყმისთვის უახლოეს დღეებში. მიუხედავად ამისა, ტრამპი საჯაროდ არ აზუსტებს, მიიღებს თუ არა აღნიშნულ გადაწყვეტილებას.

გუშინ, თეთრ სახლში სამხედრო მეთაურებთან გამართულ სხდომამდე, მან ჟურნალისტებს განუცხადა, რომ საბოლოო გადაწყვეტილება ჯერ არ მიუღია: „მიყვარს საბოლოო გადაწყვეტილების მიღება იმ წამს, როცა უკვე დროა, რადგან ომის დროს ყველაფერი იცვლება,“ – განაცხადა ტრამპმა.

მან კიდევ ერთხელ გაიმეორა, რომ არ სურს სამხედრო კონფლიქტში ჩართვა, თუმცა აღნიშნა, რომ ირანს ბირთვული იარაღის ფლობა არ უნდა ჰქონდეს ნებადართული.

შეგახსენებთ, რომ მანამდე ტრამპმა თეირანს „უაპელაციო კაპიტულაცია“ მოსთხოვა და ამას „ბოლო ულტიმატუმიც“ უწოდა. პრეზიდენტის თქმით, აშშ სრულად აკონტროლებს ირანის საჰაერო სივრცეს და იცის, სად იმალება ქვეყნის უმაღლესი ლიდერი ალი ხამენეი. „ის მარტივი სამიზნეა“, – განაცხადა ტრამპმა, თუმცა დასძინა, რომ მისი ლიკვიდაცია ამ ეტაპზე არ იგეგმება.

პასუხად, ირანის უმაღლესმა ლიდერმა ალი ხამენეიმ აღნიშნა, რომ ირანი არასდროს დანებდება აშშ-ის ზეწოლას და არ მიიღებს მის მოთხოვნებს. „ნებისმიერ ამერიკულ სამხედრო შეტევას ექნება სერიოზული და შეუქცევადი შედეგები. ირანი მტკიცედ დაუპირისპირდება როგორც თავს მოხვეულ ომს, ასევე თავს მოხვეულ მშვიდობას. ირანი არასდროს დაიხრის თავს ზეწოლის წინაშე“, – განაცხადა ხამენეიმ.